Д.Мөнх-Эрдэнэ: Миний амьдралтай холбоотой асуудал яригдаж байгаа учир хавтаст хэрэгтэй танилцаж өмгөөлөгч нэмж авмаар байна

Иргэн Д.Мөнх-Эрдэнэд холбогдох хэргийн шүүх хурал Сүхбаатар дүүргийн Эрүүгийн хэргийн анхан шатны шүүхэд болж байна.

Түүнийг консулаар ажиллаж байх хугацаандаа эрх мэдэл, албан тушаалын байдлаа урвуулан ашиглаж өөртөө болон бусдад давуу байдал бий болгосон, төсвийн хөрөнгийг зориулалтын бусаар зарцуулсан, бусдын нэр төр, алдар хүндэд халдсан илт худал мэдээллийг олон нийтэд тараасан, хууль сахиулагчийг албан үүргээ биелүүлэхтэй нь холбогдуулан хүч хэрэглэж эсэргүүцсэн, мөн Монгол Улсын Байгаль орчин, аялал жуулчлалын яамны тусгай хамгаалалттай нутгийн удирдлагын газрын даргын албан үүргийг түр орлон гүйцэтгэж байсан Б, Богдхант Уулын дархан цаазат газрын хамгаалалтын захиргааны газрын даргын албан үүргийг түр орлон гүйцэтгэгчээр ажиллаж байсан П нарт албан тушаалын байдалтай холбогдуулан хахууль өгсөн гэх хэрэгт Эрүүгийн хуулийн 22.1 дүгээр зүйлийн 1, 22.4 дүгээр зүйлийн 1, 22.5 дугаар зүйлийн 1-т зааснаар яллах дүгнэлт үйлдэн Чингэлтэй дүүргийн Эрүүгийн хэргийн анхан шатны шүүхэд шилжүүлээд байгаа юм.
Түүний өмгөөлөгч Л.Баттогтохын хувьд яллагдагчаар татагдсан зарим үндэслэлийг өмгөөлөх боломжгүй, мөн Д.Мөнх-Эрдэнийн цагдан хорих таслан сэргийлэх арга хэмжээг өөрчилж, шүүх хурлыг хойшлуулж өгөх хүсэлт гаргалаа. Шүүгдэгч Д.Мөнх-Эрдэнийн зүгээс "Цагдан хоригдож байгаа учир хавтаст хэрэгтэй танилцаагүй байгаа. Хавтаст хэргийн хаана юу байгааг мэдэхгүй байгаа учир танилцах хугацаа олгооч. Мөн консулаар ажиллаж байх хугацааны мөнгө төгрөгтэй холбоотой асуудалд санхүүгийн мэдлэгтэй өмгөөлөгч нэмж авах хүсэлтэй байна" гэлээ.
Шүүх бүрэлдэхүүн завсарлаад шүүгдэгч Д.Мөнх-Эрдэнэ, түүний өмгөөлөгчөөс гаргасан шүүх хурлыг хойшлуулах хүсэлтийг хүлээн авахаас татгалзаж шүүх хурлыг үргэлжлүүлэн явуулахаар боллоо.