Л.Энх-Амгалан сайд аа, сурагчдын мэргэжил сонголтыг ХҮНДЭЛ

БШУ-ны сайд Л.Энх-Амгалан ЭЕШ-ын бүртгэл эхэлчихсэн байхад Эрх зүйч мэргэжлээр шалгалт өгөхөөр бэлтгэсэн хүүхдүүдийн ирээдүйг үгүй хийчихлээ.

Тодруулбал тэр 2023 оны Элсэлтийн ерөнхий шалгалтын журам, босго оноог шинэчилсэн тушаалаа энэ сарын 14-нд гаргасан.
Үүнтэй хамт оюутан элсүүлэх шалгалтын нэрсийг ч зарласан. Гэтэл зарим мэргэжлийн суурь шалгалтыг өөрчилжээ.
Тухайлбал, Эрх зүйч мэргэжлээр элсэгчид Математикийн хичээлээр суурь шалгалтаа өгөхөөр болжээ.

 
Ингээд хуульч болно хэмээн мөрөөдөж, бэлтгэдэг сурагчид уг нь сүүлийн 20 гаруй жил Нийгэм судлалын хичээлээр суурь хийж, Гадаад хэлний шалгалт хамт өгсөөр ирсэн. Өмнөх жил ч ялгаагүй.
Гэтэл БШУ-ны сайд Л.Энх-Амгалан гэнэтхэн Эрх зүйн мэргэжил эзэмших гэж байгаа бол Математикаар суурь шалгалтаа өг гэж лүндэн буулгасан нь аль хэдийн ЭЕШ-даа бэлтгэж, бүр бүртгэлээ ч хийлгэчихсэн сурагчдын хувь заяаг гаргуунд гаргасан үйлдэл болчхоод байна.
Нэгэнт цаг нь тулчихсан сурагчид Нийгэм судлалын хичээлээ хаяад сар гаруйхан хугацаанд Математикийн хичээлд бэлтгэх үү.
Эрэлттэй мэргэжил биш гээд Эрх зүйч болж болохгүй гэсэн үг биш биз дээ. Хөрсөнд буухааргүй, амьдралд хэрэггүй, бусдын боломжийг үгүй хийх гэсэн шийдвэр гаргасан Л.Энх-Амгалан сайд та тушаалаа эргэж харахгүй бол энэ удаагийн элсэлтийн шалгалтаар их л олон хүүхэд бухимдаж, мөрөөдлөө гээх нь байна шүү.