Н.Энхбаяраар шүүхийхэн даажигнаж байна

Н.Энхбаярын өмгөөлөгч н.Оюунбилэг хоёрдугаар эмнэлгээс тун баргар царайтай гарч ирлээ. Тэрээр “СБД-ээс гарч ирээд, н.Энхбаяртай уулзахаар эмнэлэг рүү иртэл бие нь эрс доройтоод эмч нарын үзлэгээр орж байна. СБД-ийн шүүхэд материал нь ердөө цайны цагийн өмнө л очсон байна шүү дээ. Одоо энэ эмч нарын дүгнэлт гартлаа хоёр, гурван цаг болно шүү дээ. Дүгнэлтээ гарангуут над руу ярина гэж байна. Би ч энэ хугацаанд шүүхээ л очиж шавдуулдаг юм уу даа” хэмээгээд цөхрөнгөө барсан шинжтэй санаа алдсан юм. Хүний амь нас дээсэн дөрөөн дээр байхад монголын шүүх хүнд суртлаа мэдрүүлэн “дөмбийх” аж.