“Ирээдүйн дэлхийн аварга” замдаа гарлаа

Олимп, дэлхийн мөнгөн медальт , Монгол Улсын гавьяат тамирчин Нямбаярын Төгсцогт маань мэргэжлийн боксын рингэнд зургаа дахь ялалтаа  дөнгөж сая байгууллаа. АНУ-ын Миссиссиппи мужийн Туника  хотын  Horseshoe Tunica Hotel& Casino –д  болсон энэ тулаанд Төгсөө маань  энэ удаа Пуэрто Рикод төрж, Нью Йоркийн Брүүклинд  өссөн, мэргэжлийн боксын рингэнд 18 тулаан хийхдээ 16 удаа , үүнээс 13-ыг нь нокаутаар ялсан  “Динамит” хочит Рафаэль Васкесийг ердөө л 1 минут 24 секундэд нокаутаар яллаа.  Тулаан эхлэнгүүт л  Төгсөө санаачилгыг аван, минут ч өнгөрөөгүй байхад баруун гарын хүчтэй цохилтоор  өрсөлдөгчөө хоёр ч удаа нокдаунд оруулж тоолуулсан. Удалгүй гуравдахь удаагаа нокдаунд оруулж, рингний шүүгч тулааныг зогсоон , ялалт манай хүнд ирлээ.

2009 онд Италийн Милан хотноо болсон сонирхогчдын дэлхийн аваргаар 17-хон настайдаа  үзүүрлэж, 2012 оны Лондонгийн олимпоос алтан медалиас чухам л шүүрээд алдсан  Төгсөө маань өнгөрсөн жилээс мэргэжлийн бокст хүчээ сорьж эхэлсэн билээ.  Мэргэжлийн рингэнд “  KING TUG”   нэрээр гарч буй  Төгсөө ийнхүү зургаан  тулаан хийж,зургууланд нь өрсөлдөгчөө КО буюу нокаутаар буулган авлаа.

Тулааны дараа  ESPN- ий сурвалжлагчийн “ Ийм гайхамшигтайгаар тулаанаа дуусгана гэж бодож байв уу? Ер нь хэр их  хүчтэй  байсан бэ?” гэсэн асуултад Төгсцогт : “ Ийм хурдан ялна гэж бодож байгаагүй ч, би   үргэлж 100 хувь хүч чадалтай байдаг” хэмээн хариуллаа.  Харин Төгсцогтын дасгалжуулагч  Жо Гүүссен:“ Рафаэль Васкес дөнгөж сая над дээр ирээд “Чиний залуу ирээдүйн дэлхийн аварга шүү гэж хэлсэн. Би ч бас үүнд итгэлтэй байгаа” гэсэн юм.

“Таван цагариг”-сонины АНУ дахь тусгай сурвалжлагч Ц.Энхтүвшин.