Улсын арслан Р.Пүрэвдагва: Би шударга л барилдсан

-МАНАЙ НУТГААС ОЛОН УЛСЫН ЦОЛТОН ТӨРСӨН САЙХАН НААДАМ БОЛЛОО- 

Өнөө жилийн Үндэсний их баяр наадамд үзүүрлэн, Монгол Улсын арслан цол хүртсэн Р.Пүрэвдагватай цөөн хором ярилцлаа. Түүний хувьд 9-ийн даваанд Улсын арслан П.Бүрэнтөгсийг даван үзүүр түрүүнд үлдсэн. Гэвч тэрхүү барилдааныг маргаантай болсон гэж зарим бөх сонирхогч үзэж буй юм. Энэ талаар шинэхэн арслангаас тодрууллаа.

-Юуны өмнө таньд Улсын арслан цол хүртсэнд дахин баяр хүргэе! 

-Баярлалаа. Энэ жил их сайхан наадам боллоо. Тэгш ой болоод их сайхан боллоо. Тэгээд ч Монголын маань ард түмэн билэгшээсэн сайхан наадам болж өнгөрлөө гэж бодож байна. Манай нутгаас олон олон улсын цолтон төрсөн сайхан наадам боллоо.

-Олон хүн таныг энэ жилийн наадмаар түрүүлэх бөхчүүдийн тааварт оруулж байсан?

-Тийм ээ. Их итгэл хүлээж, энэ жилийн наадамд хүч үзсэн. Намайг дэмждэг Монголынхоо ард түмэнд баярласнаа илэрхийлье.

-Бүрэнтөгс арслантай хийсэн барилдаан нилээн хэл ам дагууллаа. Энэ талаар та тайлбар өгөхгүй юү?

-Би шударга л барилдсан. Эхний барилдаан дээр хайнцаж, хоёр дахь барилдаан дээр би давсан. Үндэсний бөхийн дүрэм журам, хөлийн цэцүүдийн шийдвэрийг дагаж барилдсан даа. 

-Та аймгуудын барилдаанд зодоглох уу?

-Барилдана. Нутгийнхаа наадамд оролцоно. Энэ жил шинэ залуу бөхчүүд их төрөн гарч байна. Нилээн хариуцлагатай барилдаанууд болох байх гэж бодож байна. 

-Та бас даншиг наадмын арслан цолтой бөх. Энэ жил барилдах уу?

-Барилдана. Сайхан барилдаан болох байх гэж байна. Улсын баяраар манай нутгийн хоёр бөх шөвгөрсөн. Даншигт ч бас шөвгөрөхийг үгүйсгэхгүй. 

-Ярилцсанд баярлалаа.