Татварын байцаагчийг 75 удаа хутгалж хөнөөсөн эмэгтэйг саатууллаа

Энэ сарын эхний өдөр 15 цагийн үед  Баянгол дүүргийн 15 дугаар хорооны ...дугаар байрны найман давхарт Чингэлтэй дүүргийн татварын хэлтэст ажилладаг 31 настай, эмэгтэй Э-г зэрлэгээр хөнөөсөн талаар бид мэдээллэсэн.

Тэгвэл өчигдөр шөнө Баянгол дүүргийн Цагдаагийн хэлтсийн ажилтнууд гэмт этгээдээр сэжиглэж байгаа нэгнийг баривчлан саатуулсан байна.

Хамгийн аймшигтай нь дээрх хэргийг 30 настай эмэгтэй үйлдсэн байж болзошгүй аж.

Тэрбээр өш хонзонгийн сэдлээр хохирогчийг орцондоо утсаар ярьж байхад нь хойноос нь хоёр хутгаар дүрж, нийтдээ 75 удаа хутгаар сийчин хөнөөсөн байна.

Уг хэргийг үйлдсэн даруйдаа орцноос гүйж гарахдаа хоёр хутгаа байрны хогийн бункерт хаясан байсныг цагдаагийнхан олжээ.

Хэдийгээр сэжигтэн одоогоор хэргээ хүлээхгүй байгаа боловч хутганаас авсан гарын хээ бусад нотлох баримтаар тогтоогдож байгаа аж.

Мөн уг хэргийг үйлдэхээр орц руу хохирогч эмэгтэйг сэжигтэн дагаж орохыг нь харсан гэрч байгаа гэнэ.

Юутай ч чухам ямар санаа зорилго, өшөө хонзонгийн улмаас нь тодорхойгүй ийм аймшигт хэрэг гарч, шалгаж байна.