Шинэ сонголтын өмнө ирсэн шүү, бид...

 Ерөнхийлөгчийн сонгуулийн сурталчилгаа дуусахад ердөө хоёр хоног үлдлээ. Монгол Улсын Ерөнхийлөгчид нэр дэвшигч Н.Удвал 21 аймаг 9 дүүрэгт ажиллаад байгаа билээ.  Харин өнөөдөр нэр дэвшигч Н.Удвал Сонгинохайрхан дүүрэгт ажиллалаа. Тус дүүрэг нэр дэвшигчийн сонгуулийн сурталчилгааны сүүлийн дүүрэг болов. Энэ дүүргийг сонгосон учрыг нэр дэвшигч Н.Удвал тайлбарлахдаа, “Бид цагаан сүүний хувьсгал хийхээр ирсэн. Хэрвээ ийм сонголтыг бид хийж чадахгүй бол Монгол орон эс орших уу, орших уу гэсэн ирмэг дээр тулж ирчихээд байна. Хэрвээ ийм сонголтыг хийж чадахгүй бол  хэн нэгний колончлолд амьдрах уу гэсэн сонголт ирчихлээ. Ийм эгзэгтэй үе учраас бид өнөөдөр шинэ сонголтын өмнө ирсэн гэдгээ ойлгох цаг нь болсон.

         Сонгинохайрхан дүүргийн хувьд олон эх орончидтой дүүрэг гэж боддог учраас сүүлийн дүүргээр сонгосон. Нийслэлийн есөн дүүргээс хамгийн олон оршин суугчидтай иргэдийн амьжиргааны төвшин янз бүр байдаг нь энэ дүүргийг бусад дүүргээс ялгаж өгдөг. Өөрөөр хэлбэл, бүх давхаргын иргэд амьдардаг. Мөн биднийг тэмцэж, ядарч, зүдэрч явахад Сонгинохайрханчууд их тусалсанд одоо хүртэл их баярлаж, бас өөриймсөж явдаг гэдгээ хэлмээр байна гэсэн юм. Нэр дэвшигч Н.Удвалыг  Сонгинохайрханчууд  “Эхийн сэтгэл” дуугаар  угтан аваад намын залуу гишүүд түүнээс намын  шинэ батлахаа  хүлээн авлаа.  Түүний талаар тус дүүргийн иргэд санал бодлоо хуваалцлаа.

Сонгинохайрхан дүүргийн 23 дугаар хорооны иргэн Н.Энхгэрэл:

• Монгол Улсын Ерөнхийлөгчид гурван  хүн нэр дэвшиж байна. Тэдний танилцуулгыг харлаа. Янз бүрийн мэргэжилтэй хүмүүс байна. Энэ дотроос эмэгтэй хүн анх удаа Ерөнхийлөгчийн сонгуульд нэр дэвшлээ. Энэ эмэгтэй мэдлэг чадвартай төрийн түшээ хүн гэж ойлгож байгаа.  Мөрийн хөтөлбөртэй танилцах явцад  эмэгтэй хүн гэдэг нь илүү харагдаж байна. Олон жил ардчилал нэрийн дор газар нутгаа худалдлаа, үндэсний аюулгүй байдал алдагдсан үүнийг хэн засах вэ. Үүнийг Н.Удвал засна гэж бодож байна.

Сонгинохайрхан дүүргийн иргэн Б.Долгормаа:

• Би эмэгтэй, залуу хүнийхээ хувьд Н.Удвал сайдыгаа дэмжиж байна. Эрүүл мэндийн салбарт ажилладаг хүний хувьд хэлэхэд сайд  томилогдсоноос хойш  олон ажлыг эхлүүлсэн. Энэ нь жирийн ажилтан бидний амьдралд нөлөөлж буй. Эх хүнээс гарсан шийдвэр үргэлж үр хүүхдүүдийнхээ төлөө байдаг учраас хэрвээ төрийн тэргүүн болчихвол иргэн бидний төлөө байна гэдэгт итгэж байна.

Баянгол дүүргийн иргэн Э.Хүрэлбаатар:

Би энд ээжийндээ оччихоод явж байсан та бүхэнтэй тааралдлаа. Энэ удаагийн сонгуульд эмэгтэй хүн нэр дэвшиж байгаагаараа онцлог. Тиймээс нэг удаа эмэгтэй хүнийг сонгоод үзэхэп болохгүй зүйлгүй. Нөгөө талаар иргэн бид эрчүүдийн худал ярихаас үнэндээ залхаж байгаа шүү гэсэн юм.

Ингээд Сонгинохайрхан дүүргийн иргэд нэр дэвшигчийг сонгуульдаа амжилттай оролцоод ялалт байгуулахыг ерөөлөө.