Өдөр тутмын хэрэглээний төлбөр зээлийн оноонд нөлөөлөхгүй боллоо

Moderator

1 цаг 23 минутын өмнө

Иргэдийн үүрэн холбоо, цахилгаан, дулаан, ус болон бусад өдөр тутмын хэрэглээний төлбөрийн мэдээллийг зээлийн оноо тооцоход сөрөг үзүүлэлт болгохгүй байхаар Монголбанк зохицуулжээ.

УИХ-ын “УИХ таныг сонсож байна” цэсээр иргэдээс ирүүлсэн санал, хүсэлтийн хүрээнд Зээлийн мэдээллийн сантай холбоотой зохицуулалтыг шинэчлэх чиглэлийг Монголбанкинд өгсөн бөгөөд үүний дагуу дээрх өөрчлөлтийг хийсэн байна.

Шинэ зохицуулалтын үр дүнд 390 мянга гаруй өр төлбөрийн мэдээлэл, 300 мянга гаруй хүлээгдэж буй төлбөрийн мэдээлэл, нийт 690 мянга гаруй мэдээлэл зээлийн оноонд хасах нөлөө үзүүлэхгүй болжээ.

Иргэдийн цахилгаан, дулаан, ус, үүрэн холбоо зэрэг үйлчилгээний төлбөрийн мэдээлэл Зээлийн мэдээллийн санд болон тухайн хүний зээлийн түүхэнд хэвээр үлдэнэ. Харин эдгээр мэдээллийг зээлийн оноо тооцохдоо оноо бууруулах хүчин зүйлд тооцохгүй юм.

Монголбанк цаашид Зээлийн мэдээллийн сангийн оноо тооцох аргачлалыг илүү уян хатан болгох, иргэдэд хүндрэл учруулдаг зарим зохицуулалт, журмыг шинэчлэх ажлыг үргэлжлүүлэхээр төлөвлөжээ.

Сэтгэгдэл (1)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

202.126.88.130

10 минутын өмнө

3 sar zeelee hiigeegvi yumaa tegeed bvgdiig neg dor hiij duusgsan yumaa tegsen ahij zeel awh bolomjgvi bolson bna lee hvnd yuch tohiooldoj boliishdee gehdee hugtsaanaas ni omon tolood duusan
Хариулах