Маргааш "Бурханы хүү" Баярбаатарын Давж заалдах шатны шүүхээр хэлэлцэнэ

Цахим орчинд "Бурханы хүү" Баярбаатар нэрээр танигдсан иргэн Б.Баярбаатарыг бусдыг цахим сүлжээнд гутаан доромжилсон хэргээр шүүхээс 30 хоног баривчлах шийтгэлийг ногдуулсан ч цагдан хорих захирамжийг түдгэлзүүлж өнгөрсөн нэгдүгээр сарын 14-нд сулласан. Тэгвэл түүнийг үргэлжлүүлэн хорих эсэхийг Давж заалдах шатны шүүхээр маргааш /2025.02.19/ хэлэлцэнэ.

Түүнд холбогдох хэргийн давж заалдах шатны шүүх хурал хоёрдугаар сарын 12-ны өдөр товлогдсон ч Б.Баярбаатарын өмгөөлөгч хэргийн материалтай танилцана гэх үндэслэлээр маргааш болгож хойшлуулсан юм.

Хэргийг эргэн сануулахад, тэрбээр 2024 оны 12 дугаар сарын 26-ны өдөр иргэн “Бурханы хүү Баярбаатар” нэртэй цахим хаягаар дамжуулан олон нийтийн сүлжээнд лайв бичлэг хийх үеэрээ ёс бус үг, хэллэг хэлж илтэд олон нийтийг үл хүндэтгэсэн асуудалд Зөрчлийн тухай хуулийн 5.2 дугаар зүйлийн 1 дэх хэсгийн 1.4 дэх хэсэгт зааснаар Зөрчлийн хэрэг нээж, шалгалтын ажиллагаа явуулж ийнхүү шийтгэл оногдуулсан байдаг.