​Шадар сайд аа, иргэд ипотекийн зээлийн хүү буурахыг хүлээж байна

Ардчилсан, ил тод, цахим, зөвлөлдөх парламентыг бий болгох зорилтын хүрээнд D-petition системд ипотекийн зээлийн 8 хувийн хүүг 6 хувь болгон бууруулах тухай өргөдөл олон нийтийн дэмжлэгийг хүлээгээд байна. 

Харин Шадар сайд С.Амарсайхан та энэ үед санаачилгаа хэрэгжүүлэх хэрэгтэй байна. Учир нь, Шадар сайд С.Амарсайхан өмнө нь Ажлын хэсэг байгуулж, хангалттай судалгаа хийсэн. 

Тэр “Ипотекийн зээлийн хүү 8% байхад Монголбанк арилжааны банкуудад 4%-ийн хүүтэй зээл олгодог байсан. Монголын Ипотекийн Корпорац Орон Сууцны Санхүүжилтийн Компани (МИК ОССК) ХХК дийлэнх хувийг арилжааны банкууд эзэлдэг, төрийн мэдлийн хувь бараг байхгүй.

Ипотекийн зээл өнөөдөр 6%-ийн хүүтэй болсон ч МИК зээлийн шимтгэл гэж 1.6 орчим хувийг авдаг. Санхүүжилтийн эх үүсвэр нь Монголбанкнаас 1%-ийн хүүтэй гардаг. Өөрөөр хэлбэл, Монголбанкнаас гарсан санхүүжилтийг аль нэг банкаар дамжуулаад МИК гэрээ хийж иргэдэд өгсний төлөө хэдэн хувийн хүү нэмж авдаг тогтолцоо байж болохгүй. 6%-аас 1.6%-ийг нь МИК шимтгэл байдлаар авч байна гэсэн үг. 100% хувийн ААН зах зээлийн зарчмаар санхүүжилтээ босгоод иргэдэд ипотекийн зээл олгодог байсан бол өөр хэрэг.

Цаашид Санхүүгийн Зохицуулах Хороо (СЗХ) МИК-д тавьдаг хяналтаа сайжруулж, Монголбанк Ипотекийн зээлийн журамдаа өөрчлөлт оруулж, ипотекийн зээлийн хүүг бууруулахтай холбоотой арга хэмжээ авч иргэдийн санхүүгийн дарамтыг бууруулах хэрэгтэй" гэж мэдэгдэж байсан. 

Гэхдээ түүний санал санаачилга гаргаж, эгээ л банкны эздийг цочоож, дургүйг нь хүргэчихээд байгаа. Харин энэ удаа иргэд өргөдөл гаргаж, гарын үсгээ зурж дэмжихээр болчихоод байна.