​Хотын дарга аа, нийслэлчүүдийг нийтээр нь дарамтлахаа больж үз

ХЗДХ-ийн сайдын ажлаа өгч Хотын дарга болсон Х.Нямбаатар “Төлбөртэй бүс тогтоох бэлтгэлээ хангаж байна. Баруун дөрвөн замаас зүүн дөрвөн зам, 32-ын тойргоос Энхтайваны гүүр хүртэл иргэд машинтай зорчихдоо төлбөр төлдөг болно” гэсэн нь олон нийтийн эгдүүцлийг төрүүлж орхилоо.
Тэр үүнийгээ түгжрэлийг бууруулах ажлын хүрээнд хэмээн тайлбарлаж байгаа юм.
Хэдэн жилийн өмнө “Нарантуул” захын эзэн Ш.Сайхансамбуугийн хүү “Шатахууны үнэ 5000 хүрчихвэл гудмаар ганцаараа машинтай явах юмсан” гэж цахимд бичээд жинхэнэ буллидуулна гээч болсон.
Харин одоо Хотын дарга Х.Нямбаатар шатахууны үнэ бус төлбөртэй бүс, авто машины импортыг “боомилох” зэргээр боомилох юм гэнэ.
Мэдээж хэн ч түгжрэхийг хүсэхгүй.
Гэхдээ өнөөдрийн түгжрэлийг бий болгоход хамгийн их нөлөө үзүүлсэн Хотын үе, үеийн дарга нар болон нийтийн тээврийн парк шинэчлэлийг үгүй хийсэн намынхаа хүмүүст эхлээд хариуцлага тооцчих.
Тэгж гэмээнэ иргэд үүргээ биелүүлэх боломж бүрдэх биз.
Байнга гадаадын жишээг иш татаж, монголчуудыг тэдэнтэй хөл нийлүүлэх шаардлагатай гэж “том” дуугармаар байгаа бол хотын стандартыг алдагдуулсан, иргэдийн төлсөн татвараар гараа угаасан намынхаа албан тушаалтнуудаас төсвөөс хулгайлсан хөрөнгийг нь буцаагаад гаргуулчих.
Нэгэнт бүхнийг нэг түвшнээс эхлүүлж чадахгүй ч энгийн иргэд илүү төлж, хоригт орж, эрх мэдэлтнүүд үүрэг хүлээхгүй, хариуцлагаас мултардаг байдлаа халчих.
Тэр цагт дараагийн алхмаа буюу төлбөртэй бүсийнхээ тухай ярь.