“Эко Констракшн” ХХК оршин суугчдын эрүүл мэндэд заналхийлж байна

“Эко Констракшн” ХХК хотын төвийн А зэрэглэлийн бүсэд “Кинг товер” хотхоныг барьж байгуулсан ч оршин суугчдаа байнга хүнд байдалд оруулдаг байна. 

Хамгийн сүүлийн жишээ л гэхэд Кинг Товерын 127-129-р байрны урд хайрганы үйлдвэр байгуулжээ. Улмаар уг үйлдвэрээ хоногийн 24 цагийн турш ажиллуулж тухайн тансаг орон сууцанд амьдарч байгаа хүмүүсийн эрүүл мэндэд заналхийлэх болсон байна.

Тодруулбал, байрнаас 100 хүрэхгүй метрт ажиллаж байгаа уг хайрганы үйлдвэр байгуулж, байнгын дуу чимээтэй байх болсноор оршин суугчид өдөр шөнийн аль ч цагт амарч чадахаа больжээ.

Мөн тус үйлдвэр нь байнга ажиллаж байгаагаас болж айлууд руу их хэмжээний тоос шороо орж, эрүүл агаар амьсгалах боломжгүй болж, эрүүл мэндэд заналхийлж байгаа юм.

Уг нь тус хотхоны оршин суугчид 300- 500 сая төгрөгөөр орон сууц худалдан авсан. Гэтэл ийнхүү үнийн дүндээ таарсан эрүүл аюулгүй орчинд амьдрах ёстой атал барилга барьсан байгууллага болох “Эко Констракшн” ХХК нь өөрөө аюул заналхийлж байгаа нь бухимдлыг төрүүлж байгаа. Тиймээс тус хотхоны оршин суугчдын тух алдагдуулж байгаа талаар “Эко Констракшн” ХХК тоохгүй удаж байгаа аж. Тиймээс оршин суугчид ХУД-ийн Засаг даргад хандахаар болжээ.