Бодлогын алдааны горыг бяцхан үрс “амсаж байна

Ингэж хэлэхийн учир нь дээхэн үед цэцэрлэгт түмний хүүхэдтэй ажиллах туслах багшийг сонгож авдаг байлаа. Товчхондоо бол цэцэрлэгийн багш болох гэсэн хүсэл эрмэлзэлтэй тийм хүнийг авдаг байсан гэсэн үг. Бүр тодруулбал хүүхэдтэй хэр сайн ажиллаж байгаа, хүүхдэд хэр зэрэг элгэмсүү байгааг нь харж байж Цэцэрлэгийн багшийн техникумд суралцахад нь тодорхойлолт хийж өгдөг байв.

Гэтэл одоо тэр бодлого үнэндээ үгүй болсон учраас өнөөдөр хэн дуртай нь цэцэрлэгийн туслах багшаар ажиллаж байгаа. Гэхдээ бүгдээрээ муу, муухай ааштай, хүүхэдтэй хэрцгий харьдаг гэсэн үг бас биш гэдгийг хэлэх хэрэгтэй.

Хорвоод мэндлээд хоёрхон жил болж байгаа бяцхан үрийнх нь далыг хөхөртөл зодсон гэх мэдээлэл өчигдөр цацагдаж олны сэтгэлийг бас л эмзэглүүлэв. Энэ үйлдлийг цэцэрлэгийнх нь туслах багш гаргасан байж.

Юугаа ч мэдэхгүй, орчлон хорвоотой дөнгөж танилцаж байгаа тэр бяцхан үрсийг хэний гарт даатгаж байгааг эндээс харж  болно.

Хуучны юм бүхнийг “Соц нийгмийн үе...” гэж үгүйсгэж байгаа бүхэн муу байгаагүй. Тэр тусмаа түмний нялх үрстэй харьцах энэ бодлого бол шилдэг нь байсан. Тиймээс цэцэрлэгийн туслах багшаар ажиллахыг хүсэгчдэд цензуртэй хандаж, хүний бяцхан үрсийг элдэв хадлагаас сэргийлж "Ул болсон" гээд байгаа арга барилыг хүссэн хүсээгүй  хэрэгжүүлэх учиртай.

Товчхондоо бол төр засаг, яам тамгын газрын бодлогын алдааны горыг хүүхдүүд амсаж байгаа энэ үйдлийг таслан зогсоож, мэргэжлийн боловсон хүчнийг бэлтгэхэд онцгой  анхаарах шаардлагатай байна гэсэн үг.

Эс бөгөөс үр хүүхдээ хөхөртөл зодуулсан эцэг, эхчүүд Малайзад болсон гэх  аав нь ирээд цэцэрлэгийн багшийг нь зодож байгаа уржигдрын бичлэгтэй ижил үйлдэл гаргаж ч мэдэх нь байна.