Нарийны гүүрээр наадсан Баянхонгорын Засаг дарга Д.Мөнхсайхан

Баянхонгор аймгийн Засаг Д.Мөнхсайханы “Ихбогд зам” компани өсөн дэвжиж,олон нийтийн зорчдог замууд эвдэрсээр байна.

Тодруулбал, хэдхэн хоногийн өмнө аадар борооны улмаас Баянхонгор-Алтай чиглэлийн авто замын Нарийн гүүрний 2 талын чулуун бэхэлгээ эвдэрч, хөвөө хучилтын ирмэгт тулж урссан. Үүнээс болж тухайн хэсгийн замыг хааж, иргэд, аж ахуйн нэгжүүд багагүй хохирол амссан.

Тухайн гүүрийг эрхэм Засаг дарга Д.Мөнхсайханы “Ихбогд зам” ХХК барьж, ашиглалтад өгч байсан нь саяхан. Товчхондоо одоо ч хариуцагчаар нь ажиллах хугацаа нь дуусгавар болоогүй тул засвар, арчлалтын ажлыг нь хийж буй.

Нарийн гүүрийг хааснаас болж иргэд бухимдаж байхад аймгийн Засаг даргын хувийн компани болох “Их богд зам” ХХК нь зам засварын ажлын ганц ширхэг олдсон механизмыг нь барьж, жолоодох хүнгүй хэмээн цаг алдаж, арга ядахдаа хүнд даацын авто машины жолооч нарыг гуйж ажиллуулж байхтай таарлаа.

Уг нь Засаг дарга Д.Мөнхсайханы хувьд замын, тэр дундаа орон нутгийнхаа замын бүхий л ажлыг хамдаг нэгэн. Тиймдээ ч жилийн орлого нь хэдэн арван саяар нэмэгдсэн биз.

“Ихбогд зам” оролцсон тендерүүд, тэр дундаа аймгийнхаа замын бүхий л ажлыг авдгаас нь харвал их л туршлагатай мэт. Гэвч хэр чадамжтай компани вэ гэдэг нь эргэлзээ төрүүлж байна.

Угтаа бол Д.Мөнхсайхан “Их богд зам” ХХК-ийн захирлаас илүү аймгийн Засаг дарга гэдэг утгаараа олон улсын чанартай авто зам эвдрэл үүсчхээд байхад, түргэн хугацаанд арга хэмжээ авах үүрэгтэй.

Атал хамгийн их уурхайтай, тоног төхөөрөмжтэй ихтэй хэрнээ жолоочгүй ганц техникээр цаг нөхцөөсөн шиг л суусан.

Иргэд тухайн нөхцөл байдлыг цахим орчинд түгээмэгц тухай хэсгийн үүрэн холбооны операторуудын сүлжээг хаачихсан нь бүр ч даапаалсан хэрэг байв.

Д.Мөнхсайхан гүүрийг засч, сэлбэж, иргэдийн зорчих хөдөлгөөнийг нээх бус өөрийнхөө албан тушаал, эзэмшигч компанийнхаа нэр хүндийг хамгаалахын тулд тийн аашилсан болов уу.