Даан ч яав даа Камертон минь

Өдгөөгөөс 28 жилийн  өмнө содон өнгө аястайгаар “Аяа миний 18 нас” хэмээн дуулан гарч ирсэн хамтлаг бол "Камертон". Урлагийн салбарт хөл тавьснаасаа хойш од болон гялалзсан тэд энэ жил 28 жилийн ойн баяртаа зориулж, зургаадугаар сарын 24-ний өдөр тоглолтоо хийсэн. Гэвч нэлээн шүүмжлэл дагуулсан үдэш болж өнгөрлөө. Учир нь "Камертон" хамтлаг тоглолт дээрээ 5 дуу дуулаад л 2 цаг орчим алга болчхож. Энэ хооронд үзэгчид Quiza, "Хар сарнай"-гийн дуунуудыг сонссон байна.

Тэгвэл "Камертон" хаачсан бэ. Тухайн өдөр MCS группын 30 жилийн ойн баяр мөн тохиосон бөгөөд "Камертон" хамтлаг тэнд очиж ая дууны мэндчилгээ дэвшүүлсэн аж. Үзэгч олон "Камертон"-ыг баярын өдрөө хүртэл халтуур хийлээ гэж ихэд ундууцаж, сошиалаар ч дургүйцлээ илэрхийлж эхэлсэн юм. Харин "Камертон" хамтлагийн ахлагч Д.Болдын зүгээс “Бүрэн хэмжээний тоглолт биш, төрсөн өдрийн үдэшлэг байсан. Мөн уран бүтээлийг маань дэмжсээр ирсэн компанийнхаа ойн баяр дээр  дуулж өгөхгүй бол ёстой муухай. Тиймээс хамтлагаараа  ярилцаад шийдвэрээ гаргасан” гэсэн утга бүхий тайлбарыг сошиал хаяг дээрээ бичсэн байв. Үнэндээ бол тэднийг энэ их амжилтад хүрэхэд спонсор байгууллагууд дэмжсэн ч гол цөм нь үзэгчид. Тийм атал үнэнч фэнүүдээ үл тоон хаяж явчхаад ийм тайлбар хийх нь  үнэндээ тэдний нэр хүндийг доош нь чангаав.

Тэдний зүгээс тасалбарын үнэ 100-480 мянган төгрөгийг буцааж олгохоо хэлсэн. Гэхдээ мэдээж бүх үзэгчдэд буцааж өгч чадахгүй нь тодорхой. Харин нэг зүйлийг чухалчлахад энд хүндэтгэл, ёс зүй, хариуцлага яригдаж буйг тэд мэдэрсэнгүй, үзэгчдэдээ үл хүндэтгэл үзүүлчихлээ. Даанч яав даа, наран жаргах адил үзэсгэлэнтэй төгсөж байсан "Камертон" минь.