Сэтгэлээ шингээж чадвал тарьсан бүхэн нь сайн ургадаг

Тэрбум мод” хөдөлгөөн өрнөж буй энэ үед толгойтой бүхэн мод тарьж  байгаа нь сайшаалтай ч хөрсний шинжилгээ авч хөрсөө судалсан нь хэд бол.

Жаахан томоохон зай талбай л байвал мод тарьж ногоон байгууламж бий болгохоор ажиллаж буй санаа нь зөв. Гэхдээ хөрс муу бол ургахгүй, эдийн засгийн хувьд ч эрсдэл хүлээнэ гэдгийг юу юунаас илүү бодолцох учиртай.

Тэгвэл гадаадынхан монголчуудыг “Төмс хөрс голдоггүй” гэдэг үгийг  эшилж мод тарьсаар байгаа гэж шүүмжилж байхыг хэдэнтээ сонсож байв. Үнэндээ бол  тийм дутагдал бий тул эмзэглэх хэрэггүй юм.

Тэгвэл өмнөд хөршид маань  мод буюу ямар нэгэн ургамал тарихын тулд хөрснөөс заавал шинжилгээ авдаг. Тэгсний дараа ямар мод тарихаа бодолцож нүхээ ухдаг. Мод тарьж буй иргэнд улсаас мөнгөн тэтгэмж олгодог ч суулгасан мод нь 3-5 жилийн хугацаанд хэрхэн ургаж байгаагаас шалтгаалж мөнгийг нь тооцож  өгдөг. Гэхдээ тарьсан мод ургамлын ургалт нь 96-100 хувь байж гэмээнэ  ажлынхаа хөлсийг авдаг гэж байгаа.

Бид үүнээс суралцах хэрэгтэй. Наанадаж ямар мод тарих гэж байгааг нь мэдэхгүйгээр баахан нүх ухчихдаг. Хөрсний судалгаа шинжилгээг алдаг оног хийсэн болдог.

Товчхондоо бол иймэрхүү байдлаар мод таривал бид “Тэрбум мод”-ыг болзоот хугацаандаа тарьж чадах эсэх нь бүрхэг юм.

Тэр байгууллага, тийм анги нэгтгэл, ААН мод тарилаа” гэж бүдэг бадаг мэдээлж тооны хойноос хөөцөлдөж, модоо суулгаад услаад хаях бус сэтгэлээ шингээж гэмээнэ сая мод сайхан ургадаг  дэлхий ертөнц хүн хоёрын шүтэлцээ  юм шүү дээ. Тиймээс эхнээс нь эрэмбэ дараатайгаар ажиллаж НҮБ-ын индэр дээрээс Ерөнхийлөгчийн авсан амлалтыг хамтдаа биелүүлцгээе.