“Эрүүл монгол хүн” хэрэгтэй юу ЭМД-ын санд мөнгө төвлөрүүлэх нь чухал уу

“Эрт илрүүлэг”  гээд уг нь нэрнээсээ эхлээд сэтгэлд нэг л өег мэдрэмж төрүүлсэн энэ ажил эхлээд нэлээд удлаа. Санаачилга сайтай, сайн ажил гэж булт олон үнэлж дүгнэж ам сайтай байгаа.

Харамсалтай  нь энэ  илрүүлэгт ахмадууд ихэвчлэн хамрагдаж үзлэгийн хувь хэмжээг өөд нь татаад байгааг мэргэжлийн байгууллагуудын мэдээллээс харж болно.

Ер нь ахмадууд бараг үзүүлээд дуусаж буй ч биз. Тэгвэл үнэндээ одоо хүнгүй шахам байгаа нь аль ч дүүрэгт очиход харагдана.

Нөгөөтээгүүр албан тушаалтнууд нэгэнтээ “Оюутнуудыг үнэгүй хамруулна” гэж дуугарсан тул хүлээлт үүсээд байгаа. Мөн залуучуудыг даруй хамрагдахыг уриалж байгаа ч  үнэндээ ажилгүй залуусын хувь хэмжээ онгойж байгаа нь ч нууц биш.

Тэд яагаад хамрагдаж чадахгүй байна гэвэл ажилгүй, орлогогүй учраас Эрүүл мэндийн даатгалын шимтгэл төлж чаддаггүй. Үнэндээ санаа байвч сачий нь хүрэхгүй. Яагаад  гэж үү.

Яагаад гэвэл эрүүл мэндийн даатгалын шимтгэлийг нөхөж төлөх тухай хуульчилсан учраас тэр. Үнэндээ ЭМД-ын шимтгэлийг нөхөж төлнө гэдэг нь аваагүй талхныхаа үнийг төлж байгаатай агаар нэг байхаар журамлачихсан учраас  ард иргэд эрт илрүүлэгт хамрагдъя гэвч дээшээ тэнгэр хол, доошоо газар хатуу болчхоод байгаа юм.

Товчхондоо бол хүн ардынхаа эрүүл мэндийг бодохоосоо илүүтэй  “Эрт илрүүлэг”-ээр ЭМД-ын санд мөнгө төвлөрүүлэх гэсэн агуулгатай нь харагдаж байгааг нуух юун.