Махны үнэ тэнгэрт хадаж, сайд нь газрын гаваар орчхов уу

ХХААХҮ-ийн сайд Х.Болорчулуун нийслэлийнхэнд бол газрын гаваар орсон мэт алга болчихлоо. Энд тэнд чуулга, уулзалтуудад үг хэлж, хүнсний аюулгүй байдал, хоол тэжээл гэсэн шүү юмс яриад л...

Гэтэл үнэн хэрэгтээ монголчуудын хувьд махны хэрэглээгээ хэрхэхээ мэдэхгүй сууцгааж байна.
Үнэндээ 71 сая толгой малтай монголчуудын хувьд мах магнаг болж нэг кг үхрийн мах 26 мянган төгрөг болчхоод байхад сайд нь аниргүй байгаа нь аймшиг биз дээ.
Арга ядсан уу, асуудал үүсэж ард түмэн жагсахаас эмээсэн үү ямартай ч өнөөдрийн Засгийн газрын хуралдаанаар махны үнийн асуудлыг хэлэлцэхээр төлөвлөөд байгаа.
Нөөцийн мах гэж гаргасан ч өнөөх нь олдохоо байсан. Хөөрхий энэ нөөцийн мах нь үнийн хөөргөдлөөс сэргийлж буй арга хэлбэр боловч энэ жилийн хувьд Гулуузаар нь авъя гэхээр дүүрэгт ганц дэлгүүрт эрх өгсөн байх жишээний.
Ийм байхад монголчууд нийтээрээ биш юм аа гэхэд нийслэлчүүд бухимдахаас арга алга.
Бодлого тодорхойлох учиртай салбарын сайд нь мах биш гурилдаа илүү санаа тавиад завгүй явна уу эс бөгөөс ирэх сонгуульд эргэн ирэх гээд хөдөө, тойргоо услаад явна уу, таг.
Уг нь өнгөрсөн онд гол нэр төрлийн зарим бараа, бүтээгдэхүүний үнийн өсөлт, хомстлоос сэргийлэх, сөрөг нөлөөллийг бууруулах тухай хууль батлагдсан.
Энэ хүрээнд хүнсний, тэр дундаа мах, гурилын үйлдвэр эрхэлдэг компаниудад төрөөс нийт 90 орчим тэрбум төгрөгийн зээл олгосон. Амьхандаа үнийг нь тогтвортой байлгах, хомстуулахгүй гэж л тэр.
Гэтэл үүргээ биелүүлээгүй. Тиймээс ч ШӨХТГ-аас төрөөс 3 хувийн хүүтэй, хөнгөлөлттэй зээл авсан мах, гурилын компаниудад шалгалт хийж эхлээд байгаа шүү дээ.