​ Зоосон нүдтэй соёлын дайснууд

Чойжин ламын сүм музей ашигтай, орлоготой ажиллаж болохыг олон нийт сайн харлаа. Учир нь тус музейд өчигдөр “Говь” компанийн шинэ коллекцийн танилцуулга шоу болсон.
Чойжин ламын сүм музейд тусгай үйлчилгээний тариф гэж бий. Фото зураг авахаас эхлээд бичлэг хийх зэргийг хийхэд 200.000-5.000.000 төгрөгийн төлбөр төлөх ёстой. Тэр ч утгаараа “Говь” ХК-ийн шоу л гэхэд ганц удаагийн төлбөртөө овоо хэлэн сая төгрөг тус музейн санхүүд тушаасан байж таарна.

Гэтэл сар хүрэхгүйн өмнө Чойжин ламын сүм музейн урд талбайд барилга байгууламж барих гэж байна хэмээн багагүй дуулиан өрнөх үеэр салбарын сайд нь ч, музейн захирал нь орлого, ашиггүй хүнд хэцүү байдгаа гайхан ёстой л матрын нулимс унагаж байв шүү.
Тухайн үед Соёлын сайд Ч.Номин ногоон байгууламжийг нь сүйтгэхгүй, орчин нөхцөлийг нь сайжруулах гэж байгаа хэмээж байв.
Харин тус музейн захирал Д.Отгонсүрэн “Манай ажилчид жил бүр эрүүл мэндийн үзлэгт ороход эмэгтэйчүүд нь бөөр давсаг, эмэгтэйчүүд, гуурсан хоолойн үрэвсэл гэдэг өвчтэй болсон. Манайх халаалтгүй учраас цахилгаан тенн залгаж ажилладаг. Ийм хүнд нөхцөлд 580 мянган төгрөгийн цалин авч, энэ нийгэмд амьдарч чадах уу. Манайд ажилтан олдохгүй байна” гэж ярьж байсан.
Үнэндээ хөрөнгө, мөнгөгүй хэцүү байна гэдэг агуулгыг хэн хэн нь л хэлж байсан. Гэхдээ тус музейнхэн олсон ашиг, орлогоо шууд төсөвт тушаачихдаг хэрэг үү эс бөгөөс засвартаа зарцуулаад ч нэмэргүй болчихсон юм уу.
Уг нь “Говь”-ийнхтой адил шоуг ядаж зуны улиралд хэдэн удаа зохион байгуулахад л Чойжин ламын сүм музейн эдийн засагт “гэрэл” асчихмаар санагдах юм. Үүнийг нь тус сүм музейн захирал Д.Отгонсүрэнгийн менежментээр шийдчих боломж ч бий.
Харамсалтай нь хэдий “зоосон нүд”-тэй ч менежментийн зохицуулалтаа хийж чадахгүй бол соёлоо ч устгаж, ажилчдаа ч бага цалинтай, тохьгүй газар байлгасаар байх нь байна шүү дээ.