Үндсэн хуулийн өөрчлөлтийг эсэргүүцэгчид

УИХ-ын байнгын хороодоор Үндсэн хуулийн өөрчлөлтийг хэлэлцэж буйтай зэрэгцэн гишүүд байр сууриа илэрхийлсээр буй. Парламент дахь намууд нэгэнтээ гишүүдийн тоог 126 байх тухайтад санал нэгтэй байгаа. Харин эсэргүүцэгчид нь ирэх сонгуульд нэр дэвших эрхгүй, эргээд тойрогтоо очих нүүргүй болчихсон нөхөд байгаа бололтой.

Уг нь Ерөнхий сайд өнгөрсөн жилийн өдийгөөс эхлээд Үндсэн хуулийн өөрчлөлтийг эсэргүүцээд байсан УИХ-ын гишүүн Б.Бат-Эрдэнэ, Х.Болорчулуун, Ц.Даваасүрэн нарын амыг хамхиад Засгийн газрын гишүүн болгоод дуугүй болгосон. Тэднээс гадна УИХ-ын гишүүн Д.Цогтбаатар, С.Ганбаатар нарын гишүүд ч эсрэг байр суурьтай байна билээ.

Гэвч тэд энэ удаа сонгуулийн чимээ ойртсон учраас дахиад л сүрийг үзүүлж эхэлжээ.
Өдгөө УИХ-ын гишүүдийн тоог нэмэх тухай асуудал яригдаж байгаа ч энэ удаагийн парламентаас цөөнгүй хүн дахин нэр дэвших эрхгүй болчихсон.
Тодруулбал, Хөгжлийн банкны болон нүүрсний гэх хэргийн яллагдагч, холбогдогчид УИХ-ын бүрэн эрхээ эдлээд “цэмцгэр” суугаа. Тэгэхээр тэдгээр гишүүдийн хувьд юун нэр дэвших, “дээлээ л нөмөрчихгүй бол...” гэчихсэн яваа.
Нөгөө талд байнга өөрсдийн хувийн амбицаа хурцалж, хэд өчнөөн удаа парламентад сонгогдсон ч төрийн болон тойргийнхоо төлөө өчүүхэн ч ажиллаж чадаагүй хүмүүсээ намууд нэр дэвшүүлэхгүй хэмээн дотооддоо ярилцжээ.
Тиймээс дээр нэр дурдсан гишүүд өөрсдийн намаас “НЭР ДЭВШҮҮЛЭХ” визээ автлаа эсэргүү байр суурь илэрхийлэх аж. Өөрөөр хэлбэл, тэд Үндсэн хуулийн өөрчлөлтийг өөрийнхөө нэр дэвших эрхийн тасалбар болгон ашиглаж байна гэсэн үг.