“Эко констракшн”-ыг зогсоочхоод авлигагүй нийгэм гэж шууръя

Улаанбаатар хотын төв цэгийн хажууханд, Төв шуудангийн урд талд дахиад л нэг авлига хороолол сүндэрлэх нь. Тэр нь “Эко констракшн”-ы барихаар төлөвлөж буй 54 давхар барилга. Үүнийг хотын удирдлагууд болон Засгийн газрын холбогдох салбар яамныхан зогсоох ёстой.
Нийслэлийн ерөнхий Архитектур Ц.Тулга “Хотын дахин төлөвлөлтийн хүрээнд тухайн газар байсан С61 барилга ашиглалтын шаардлага хангахаа больсон. Шинээр барих төслийг “Эко констракшн” хэрэгжүүлэхээр ажлаа эхлүүлсэн. Тус компанийн зүгээс 54 давхар барилга бариулах хүсэлтээ ирүүлсэн. Хүсэлтийг хараахан шийдвэрлээгүй байна.” гэж ярьж байна билээ. Энэ ердөө ОДООХОНДОО өгч буй тайлбар.
Уг нь “Улаанбаатар хотын 2040 он хүртэлх хөгжлийн ерөнхий төлөвлөгөө”-нд Их болон Бага тойрууд өндөршлийн хязгааргүй барилга бариулахгүй буюу 6 давхраас дээш барилга бариулахгүйгээр тусгасан гэж Хотын дарга Д.Сумъяабазар хэдхэн сарын өмнө УИХ-ын чуулганы танхимд танилцуулж байсан.
Гэтэл өнөөх “Эко констракшн” 6X9=54 гэчихсэн суугаа бололтой. Эс бөгөөс МАН-д өгсөн, хандивласан хөрөнгө, мөнгөндөө бардаж яваа биз.
Уг нь манай улсад барилгын чанар, стандартыг ягштал мөрдүүлдэг бол өнөөдөр “Эко констракшн” хотын төв цэгт 54 давхар барилга барих байтугай тусгай зөвшөөрлөө цуцлуулах хэмжээнд хүрчихсэн.

Нийслэлийн дүүрэг бүрд барьж, борлуулсан тэдний орон сууцууд бий. Харамсалтай нь, хүлээлгэн өгөх хугацаа нь дуусгавар болохоос өмнө чанар нь ил болдог. Шүүгээд үзвэл “Эко констракшн”-д хохирсон, гомдсон, уураа барсан иргэдийн цуваа тасрахгүй. Тэд барилгын компанийн сайхан сурталчилгаанд хууртсанаа сүүлд мэдсэн байдаг.
Тийм байтал өдгөө дахиад 54 давхар барилга барих гэж байгаа нь өөрөө авлигын үнэр, чимээ дагуулж байгаа хэрэг.
Учир нь саяхан ашиглалтад орсон “Эко интернейшнл трэйд тауэр”-ыг олон нийт мэдэж буй. Тухайн хэсэгтээ хамгийн өндөр буюу 26 давхар энэ барилгын гадна авто зогсоол байх хэмжээний буюу хаяа залгасан 54 давхар барилга барих нь өөрөө олон дүрэм, журам зөрчиж байгааг харуулж буй.
Засгийн газраас 2023 оныг Авлигатай тэмцэх жил болгон зарлаж, 5Ш ажиллагаа эхлүүлсэн. Гэтэл МАН-ын гишүүд эрх баригчдынхаа буянаар авлигын чимээтэй ажлаа үргэлжлүүлсээр байгааг хэрхэн ойлгох вэ.