Дэлхийн энергийн төвийг бузарласаар байх уу

Хамрын хийдийг зоригсдын хөл хэзээ ч татрахгүй. Тэнд  дэлхийн энергийн төв байдаг учраас тэр.

Говийн догшин хутагт Дулдуйтын Данзанравжаатай салшгүй холбоотой тэр нутагт,  тэр тусмаа Хамрын хийдэд яг л энэ үеэр сайхан бүхний эхлэл хэмээгддэг сакура ч бас цэцэглэдэг учраас харахыг хүсэгсэд олон.  

Ерөнхий сайд Л.Оюун-Эрдэнэ нэгэнтээ  “Аялал жуулчлал бол зөвхөн нэг яамны асуудал биш. Үндэсний нэгдмэл үнэт зүйлтэй холбоотой, салбар хоорондын цогц асуудал. Төр, хувийн хэвшлийн түншлэлд тулгуурлаж аялал жуулчлал хөгжих  учиртай. Төр, хувийн хэвшил нэгдсэн маркетинг, брендингтэй байх нь чухал” хэмээсэн нь ч бий.

Тэгвэл аялал жуулчлалын нэгэн бүс нутаг Хамрын хийдэд анхаарал тавихгүй бол үмхийрч илжирч мэпдэхээр байна.

Товчхондоо бол аялал жуулчлалыг утгаар нь хөгжүүлж, жуулчдыг татаж, Монгол Улсын эдийн засгийг сэргээх нэгэн хөшүүрэг гэж буй яг энэ цаг үед Хамрын хийдийг зоригсдод  хамжаарга хэрэгтэй байна гэсэн үг.

Хамрын хийдийн нэгэн чухал хэсэг буюу “Мөөм хад”-ыг хүмүүс ёстой л бузарлаж байна гэж хэлж болно. Мөөмнөөс сүү гарах ёстой” гэх бодолдоо  хөтлөгдөн бодож сүү өргөдөг байх. Гэтэл хамаа намаагүй цацсан сүү  нь холоос харахад сүүн зам татуулсан байх ч ойртоод очихоор гашилсан сүүний эвгүй үнэрт мансуурах нь холгүй болж ам хамраа дарж боохгүй бол горьгүй болсон байх жишээтэй.

Уг нь ус, цус, сүү гурав амьдралыг тэтгэгч хэмээдэг. Тэр тусмаа сүүг газар асгадаггүй, усанд дусаадаггүй.  Сүү тараг, айргийг  санамсаргүй асгавал “Амны хишиг барагдана” хэмээж  тэргүүндээ  хүргэж “гэмээ цайруулдаг” дом хүртэл хийдэг ард түмэн. Гэтэл өнөөдөр дэлхийн энергийн төвийг ингэж бузарлаж байна.

Тиймээс дэлхийн энергийн тав хэмээдэг Хамрын хийдийг онгон дагшин ариун хэвээр нь байлгамаар байна.