​ Б.Цэнгэл дарга аа, чанга дуугарсныг биш чанд сахилга баттайг нь ажиллуул

ТӨБЗГ-ын дарга Б.Цэнгэл Хөтөлийн “Цемент шохой” үйлдвэрт ажиллаад “Хоёр талаас өгсөн мэдээлэл зөрүүтэй байна. Өөрийн биеэр ирж, нягталж, хүмүүстэй нэг бүрчлэн уулзахыг зорилоо. Зарим нэг мэдээлэл ташаа болох нь харагдлаа.” хэмээгээд ТУЗ-ийг бүрэн бүрэлдэхүүнээр нь огцруулахаар болсноо зарласан.
Уг нь ганцхан өдрийн өмнө л мань Б.Цэнгэл “Хөтөлийн цемент шохой компанийн захирал Л.Наранбаатар цахимаар ажлаа хийдэг. Мэдээллийн бодит үнэн, мэдээллийн зөрүүтэй байдлыг нягталж шалгана. Үндэсний аудитын газрын байгууллагын дүгнэлтийг Л.Наранбаатар хүлээн зөвшөөрөхгүй байгаа. Түүнчлэн архи уухаараа ажилдаа ирдэггүй, хэдэн хоног алга болдог ийм удирдлага надад хэрэггүй гэдгийг нөхөрсгөөр хэлж байсан. Би энэ тухай нь анхааруулж, үйлдвэрийг алсын зайнаас удирдана гэж байхгүй шүү гэж хэлсэн.” гэж байв.
Гэтэл өнөөх яриад байснаараа үйлдвэрт нь очоод байр суурь нь ёстой 180 градус эргэнэ гээч болчихсон.
Товчхондоо мань түүний энэ үйлдэл Б.Цэнгэл ТӨБЗГ-ын даргын ажлаа хэр гүйцэтгэж байна вэ гэдгийг нь л олон нийтэд харууллаа.
Мэдээж Б.Цэнгэлийн хувьд аж ахуйн нэгжүүдийн удирдлага болон тэдгээрийн ТУЗ-тай шууд харилцан ажиллаж явах хуулийн заалт бий. Гэвч тэр хуулийн заалт бус цахим орчин болон хэн чанга дуугарсных нь талд үйлчилж байна гэх хардлагыг төрүүлж байгаа юм.