Ерөнхий сайд аа, цүнх баригч Г.Батдоржийн чинь чадвар дутаад байна

Цүнх баригчдаа яам, агентлагуудад томилсондоо амаа барьж, ажлаас нь чөлөөлсөн ч зарим нь дахин томилогдохын тулд ТАЗ-д сонгон шалгаруулалтын зараа ч өгүүлжээ. Тэдний нэг нь Гэр бүл, хүүхэд, залуучуудын газрын дарга Г.Батдорж. Үнэндээ түүнийг тус газрын даргаар ажиллах чадамжтай менежер биш гэдгийг хэдхэн тооноос л харж болно. Өнгөрөгч 2021 онд гэмт хэрэг үйлдсэн хүүхэд 921 байсан бол 2022 онд 1540 болж өссөн байна. Гэмт хэргийн хохирогч болсон хүүхдийн тоо 2020 онд 1181, 2021 онд 1365 2022 онд 2014 болж байнга өсчээ.

2020-2021 он бол ковид, цар тахлын халдвараас болж гэр бүлүүд тун ойр, ихэнхдээ хамт байсан. Гэтэл дээрхээс гадна хүүхэд гэмтсэн, нас барсан, залуучууд, эмэгтэйчүүд хохирсон, гэмт хэрэг үйлдсэн тоо ч өссөн байна. Энэ нь гэр бүл, хүүхэд, залуучууд, эмэгтэйчүүд, хүүхдийг гэмт хэрэг зөрчлөөс урьдчилан сэргийлэх, хариу үйлчилгээний чанар хүртээмж, хууль эрх зүй, хүчирхийллийн эсрэг, нийгмийн эерэг сэтгэл зүй хандлага төлөвшүүлэх чиглэлээр соён гэгээрүүлэх ажлыг эрчимжүүлэх чиг үүргийн ажил үнэндээ байхгүй болсны илрэл.

Мэдээж асуудлыг харахад олон талын салбар дундын асуудал хэдий ч үндсэн чиг үүрэг нь Гэр бүл, хүүхэд, залуучуудын газарт хамаардаг. Гэтэл гэмт хэргийн эдгээр тооноос харахад л үйл ажиллагаа үр дүнгүй, анхан шатныхнаа мэргэжил арга зүйгээр хангаж чадахгүй байсны л гор.

Хэрэв Г.Батдорж мэргэжлийн боловсон хүчин байж, 100 жилийн түүхтэй Хүүхдийн салбарыг өөд нь татах чадамжтай байсан бол Хүүхэд хамгааллын зардлын оновчтой зарцуулалт, нийгмийн ажилтнуудын цалин, нийгмийн хамгаалал, Хүүхдийн тусламжийн утас, Хохирогч, даван туулагч хүүхдүүдийг нөхөн сэргээх Бүсчилсэн төв байгуулах, хүүхэд хамгааллын хариу үйлчилгээний чанар хүртээмж хангалттай байх байлаа. Харамсалтай нь Г.Батдоржид мэдлэг дээр нь сэтгэл дутаад байгаа учраас хүүхдүүд л хохирогч болсоор байна.