ШӨХТГ-аар далайлгагч С.Мөнхчулуун

ШӨХТГ улстөрчдийн хувьд хувийн тоглолтоор карьераа өсгөдөг газар болж хувирлаа. Мэдээж бүх дарга нь тийм байгаагүй. Өнөөгийн С.Мөнхчулуун мэтийн улстөрийн намаас гарч тодрох гээд баралгүй буцаад намаа бараадсан хүмүүсийн шат ахих гишгүүр болсон гэхэд хилсдэхгүй.
С.Мөнхчулуун хэзээнээсээ хувийн тоглолтоороо гоцордог. Хөөрхийг нам нь эргүүлж аваад, ШӨХТГ-ыг хариуцуулсан нь үнэн. Гэвч мань хүн фэйсбүүк, жиргээнд л ажиллаж байна гэдгээ зарлахаас арай өөрөөр сэтгэж, “сэлэм эргүүлж” чадаагүй. Өнгөрөгч нэгдүгээр сард ковидын хуулийн үйлчлэл дуусаж, түүнийг үүрэгт ажлаас нь чөлөөлсөн. Засгийн газар түүнийг чөлөөлсөн шигээ дараагийн даргынх нь сонгон шалгаруулалт өнөөдрийг хүртэл зарлагдаагүй л байна.
Хэдхэн хоногийн өмнө ШӨХТГ Юнивишнийг торгож, Алтан тариа ХХК-д торгууль ногдууллаа. Ард иргэд нийтээрээ аятайхан шийдвэр хэмээн алга ташиж байна. Бүр зарим нь С.Мөнхчулуунд талархаж, “чи л шударга хүн” гэх малгай ч өмсгөж байна.
Гэхдээ дээрх шийдвэрүүд чөлөөт эдийн засгийн нийгэмд зөв торгууль мөн үү. Тэрхүү торгууль, шийтгэл нь хэрэглэгчдийн халааснаас гарч, төлөгдөхгүй гэж үү.
Үүнийг нь баталж Алтан тариа ХХК-ийн захирал П.Цэнгүүн шулуухан хэлж байна билээ. Тэр “Торгууль, татвар бүгд хэрэглэгчдийн халааснаас гардаг. Тийм ч болохоор бид гурилын үнийг кг тутамд 20 төгрөгөөр нэмлээ” гэсэн.
Үнэн нь л энэ. Ёстой л П.Цэнгүүн ил хэлж байгаа болохоос олон үйлдвэрлэгч яг энэ зарчмаар яваа.
Нөгөөх нь Юнивишн. Байшин болон гэр хорооллоос ялгавартай төлбөр авсан учраас мөн торгуулахаар болсон.
Уг нь С.Мөнхчулуун өөрийгөө инженер хүний хувьд гэж ирээд асуудал хөнддөг. Тэгвэл инженер хүн Монгол Улс байтугай Улаанбаатар хотод шилэн кабель татаж, тавьж, хэрэглэгчдэд хүргэхэд яагаад ялгавартай байдгийг хамгийн сайн мэдэх учиртай.
Харамсалтай нь С.Мөнхчулуун энэ зэргийг ойлгохыг хүссэнгүй. Харин өнөөх байгын ашиглаж, ажлын байраа болгосон фэйсбүүк, твиттертээ том компаниудыг торгосон том дарга нэр зүүхийн тулд жиргэж, олон нийтэд түгээсээр суугаа.
Цаад утгаараа ШӨХТГ-т С.Мөнхчулуун шиг хэрэгтэй хүн байхгүй гэдэг зүүлт зүүж дахин томилогдох хүсч буй хэрэг. Мэдээж дараагийн удаа ШӨХТГ-ын нэрээр дөрөөлж, УИХ-ын гишүүн болох алс холын мөрөөдөлдөө дараатай л яваа бололтой.