ЦЕГ: О.МӨНХЖИН НЬ МОНГОЛ УЛСЫН ИРГЭНШЛЭЭС ТАТГАЛЗААГҮЙ БАЙХДАА АНУ-ЫН ИРГЭН БОЛЖ, ТУС УЛСЫН ПАСПОРТЫГ ЭЗЭМШСЭН

Цагдаагийн байгууллагаас “Ихбит” ХХК-ийн удирдах албан тушаалтнууд болох О.Мөнхжин, Б.Эрхэмбаяр, Б.Гантиг нарт Эрүүгийн хуулийн 18.19-2.1, 18.19-2.2 дахь хэсэгт заасан “Виртуал хөрөнгийн үнэ цэнд нөлөөлөх нийтийн хүртээл болоогүй дотоод мэдээллийг ашиглаж виртуал хөрөнгийн арилжаанд оролцсон, эсхүл дотоод мэдээллийг бусдад дамжуулсан гэмт хэргийг бүлэглэж, албан тушаалаа урвуулан ашиглаж үйлдсэн” гэх үндэслэлээр яллагдагчаар татаж, мөрдөн шалгах ажиллагааг явуулж буй.

Үүсээд буй асуудалтай холбогдуулан ЦЕГ-аас тодрууллаа.

ЦЕГ: Харьяатын тухай хуулиар Монгол Улс Хоёрдмол харьяаллыг зөвшөөрдөггүй бөгөөд яллагдагч О.Мөнхжин нь Монгол Улсын иргэншлээс татгалзаагүй байхдаа АНУ-ын иргэн болж, тус улсын паспортыг эзэмшсэн ба Монгол Улсын нутаг дэвсгэрээс гарсан тохиолдолд АНУ-ийн иргэн гэж үзэн Ихбит ХХК-ийн токенд хөрөнгө оруулсан иргэдэд их хэмжээний хохирол үүсч, нөхөн төлөгдөхгүй байх эрсдэл үүссэн.

Иймд О.Мөнхжинг Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.3 дахь хэсэгт заасан “Гэмт хэрэг үйлдэж болзошгүй үндэслэл бүхий баримт, мэдээлэл байгаа” нь хэрэгт авагдсан нотлох баримтуудаар тогтоогдсон тул дахин гэмт хэрэг үйлдэхээс урьдчилан сэргийлэх зорилгоор Нийслэлийн прокурорын газрын саналыг үндэслэн урьд 2023 оны 02 дугаар сарын 06-ны өдөр авсан Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг өөрчилж, 2023 оны 02 дугаар сарын 14-ний өдрөөс эхлэн 30 хоног цагдан хорихоор  Сүхбаатар дүүргийн Эрүүгийн хэргийн анхан шатны шүүхээс шийдвэрлэсэн.

Тухайлбал: Яллагдагч нар нь мөрдөн шалгах ажиллагааны явцад Deployer хаягнаасаа гүйлгээ хийж, дахин энэ төрлийн гэмт хэргийг үйлдэх боломжтой бөгөөд тухайн ажиллагаанд Эрүүгийн хэрэг хянан шийдвэрлэх тухай хуульд заасны дагуу хязгаарлалт тогтоох боломжгүй нөхцөл байдал үүссэн.

Мөн “Ихбит” ХХК-ийн удирдах албан тушаалтан яллагдагч Б.Эрхэмбаяр, Б.Гантиг нарт цагдан хорих таслан сэргийлэх арга хэмжээ авах саналыг прокурорын газраас шүүхэд хүргүүлсэн ч шүүгчээс татгалзсанаар хурлыг хойшлуулсан.

Цахим орчинд зарим иргэд, хуульчдын зүгээс цагдан хорих таслан сэргийлэх арга хэмжээ авч байгаа нь хүний эрхийн зөрчил гэж мэдээллэж байна. Прокурор, хэргийн оролцогчид, яллагдагч, түүний өмгөөлөгчийг оролцуулан цугларсан нотлох баримтыг судлан шинжилж, шүүгчийн захирамжаар тус арга хэмжээг авдаг бөгөөд мөрдөгч хэн нэгнийг шууд цагдан хорьдог асуудал байх боломжгүй ба Эрүүгийн хэрэг, хянан шийдвэрлэх тухай хуульд ч тийм эрх олгоогүй.

Мөн Монгол Улсын Эрүүгийн хуульд зааснаар гэм буруутай эсэхийг урьдчилан тогтоохыг хориглох бөгөөд гэм буруугийн асуудлыг зөвхөн шүүх шийдвэрлэх тул цагдаагийн байгууллагын хуульд заасан чиг үүргийг хэрэгжүүлэх, хэрэг мөрдөн шалгах ажиллагаанд хөндлөнгөөс нөлөөлөх асуудал нь мөн хуулийн хариуцлагатай асуудал юм" гэлээ.