​Өөг өөрөөсөө хай

Олон зүйл нуршихгүй, ийм нэг сайхан шударга үг байдаг даа. Тэгвэл энэ үгийг Хууль зүй дотоод хэргийн сайд Х.Нямбаатарт хүргэмээр байгаа юм. 

Тэрбээр өнөөдөр “Мета” компанийн төв Ази, Хятад, Монгол Улсын олон нийтийн бодлого хариуцсан захирал Жорж Ченийг ажлаас нь чөлөөлүүлэх өргөдөл илгээнэ гэж байгаа. Үүнийгээ ч аль эрт мэдэгдэж байсан ч “болзоот өдөр” өнөөдөр. Товчхондоо бол өөрийг нь олон нийтийн сүлжээгээр гүтгэсэн Жорж Чен гэгчид ”Энэ бол нөгөө хууль” гэдгийг мэдрүүлж батлах гэж буй. 

Гэхдээ олны зүгээс эрхэм сайдад тун таагүй хандаж байгаа. Учир нь үтэр түргэн оруулж ирсэн хуулийн төсөл “Улаан гэрлээр” орж батлагдсан нь, тэгээд хүний эрхийг ноцтойгоор зөрчиж буй асуудал гэж харж буй учраас монголчууд төдийгүй гадаадын улс орнууд ч эмзэг хүлээж авсан. 

Харин Х.Нямбаатар сайдын хувьд чимээгүй байж байснаа “Монгол Улсыг хоригт оруулна”, “АНУ-ын зүгээс шахалт дарамт үзүүлнэ” гэх зэргээр улстөрийн албан тушаалтнуудад дарамт үзүүлж мессеж илгээсэн” гэж хэлсэн нь түүнийг олонд муухай харагдуулаад байгаа. 

Харин Жорж Чен "Үзэл бодлоо чөлөөтэй илэрхийлэх нь хүний үндсэн эрх Хууль зүй дотоод хэргийн сайд нь бидэнд хуулиа урьдчилж танилцуулаагүй хэрнээ танилцуулсан мэтээр ярилаа. Монголын парламент уг хуулийн төслийг баталсных нь дараа л анх удаа харж байна" гэсэн. 

Уг нь монголчууд “Нөхрийн хуучин, дээлийн шинэ нь...” гэж ярьдаг ч энэ удаад Жоржид итгэчхээд байгаа. Тэгвэл улстөрчид “Элэг нэгтнүүддээ үл итгэж, хүний хүн гээчийн амнаас гарсан үгэнд яагаад итгэв” гэдэгт л анхаарлаа хандуулж чадвал эрүүлээр сэтгэж эергээр харж буй үйлдэл.

Нөгөөтэйгүүр ард түмэн өнөөгийн улстөрчдөд тавьж буй үнэлгээ бөгөөд Жорж, сайд 2-ын хэрхэхийг бөмбөрцөг даяараа чагнах "Өөг өөрөөсөө хай" гэдэг үгийг эрхэм сайдад хаягламаар байгаа юм даа.