​Ч.Номин сайд аа, ажлаа хий

Барилгачдын хөдөлмөр нүдэн дээр илхэн харагддаг бол соёл урлагийнхны хөдөлмөр, үр шим нь хожмоо мэдрэгддэг. Соёл урлагаар бид хүмүүжиж, ирээдүйн иргэдээ ч соёл урлагаар л хүмүүжүүлдэг. Тиймээс соёл урлагийг дэлхий нийт чухалчилж авч үздэг. Салбарын хүмүүс нь ч сэтгэл зүрхээ зориулан ажилладаг. Манай улсад ч мөн адил соёл урлагийнхан бор зүрхээрээ зүтгэсээр өнөөгийн түвшинд хүрсэн. Ялангуяа орон нутгийн театрынхан урлагт сэтгэл зүрхээ зориулан ажилладаг. Гэсэн ч тэд 600-800 мянган төгрөгийн цалинтай. Одоогийн нийгэмд 1.500.000 төгрөгийн цалин хүрэлцэхгүй байхад үүний тал цалингаар амьдралаа залгуулна гэдэг тун бэрх ч урлагт хайртай тэд чин сэтгэлээрээ ажлаа хийсээр л байна.

Үнэндээ бол тэднийг орон нутгийн иргэдийн сэтгэлийг хөглөж байдаг улсууд гээд хэлчхэд нэг их буруудахгүй. Орон нутгийн театрынхаа галыг манаж үлдсэн цөөхөн хэдэн уран бүтээлч өнөөдөр туйлдаж, ажил хаялт хүртэл зарлаж байна. Арга ч үгүй биз. 

Уг нь бол манай улс Соёлын яамтай, сайдтай. Гэвч Ч.Номин сайд орон нутгийн уран бүтээлчдээ хөсөр хаяж буй нь иргэдийн урлаг, уран сайхан үзэх нүдийг нь боосонтой ижил болчхоод байна. 

Соёлын салбар бол шоу нэвтрүүлэг хийхээс тэс өөр, өргөн хүрээний хариуцлагатай ажил. Соёлын сайд нь бодлого ярьж, Монголын өв уламжлалаа дэлхийд таниулна гэж том дуугарч байхад тэнд орон нутгийн буйдхан театр сүйрч байгаа нь ярихаас илүү хийх нь чухал болохыг харуулж буй юм.