Халиа үүсгэхгүй, үерт автахгүй, агаарын бохирдол, түгжрэлгүй болъё гэвэл Сэлбийг сэргээгээд өг

Нийслэлийн иргэд нийтээрээ агаар, хөрсний бохирдолд хордож, өвөлдөө халиа дошинд хашуулж, зундаа үер усанд боогдож, замын түгжрэлд бухимдахгүй байх боломж байна. Бүр урт хугацаа, их хэмжээний хөрөнгө ч шаардлагагүй.

Тэр нь олон нийтийн амны бай болоод байдаг Сэлбэ гол.

Нийслэлчүүд Сэлбэ голоо сэргээчихвэл агаар, хөрсний бохирдлоос сална. Цаашлаад Сэлбэ голынхоо эргийг тохижуулж, хөгжүүлээд автозамын түгжрэлийг бууруулж, явган болон дугуйн зам, амралт зугаалга, худалдаа үйлчилгээний бүс, хонгилын систем зэргийг бүхэлд нь шийдэх боломжтой байгаа аж. Мэдээж үүнийг дагаад гэр хорооллын барилгажилтын ажил ч өргөжнө.

Эдгээрийг Нийслэлийн ерөнхий архитектор Н.Нацагдоржийн “Сэлбэ сэргэлт” төслөөс харж болохоор байгаа юм.

Нийслэлчүүд Сэлбэ голыг өөрийн ойрын хүрээнээс л харж, мэддэг. Ихэнх нь Сансар, Имарт, Арслантай гүүр, хүүхдийн парк орчмыг нь мэднэ. Учир нь тухайн хэсэг нь хотын төв дундуур урсаж буй бөгөөд Сэлбэ голд байдаг ердөө есхөн км далан, түшиц ханатай орчин.

Харин бусад нь буюу Сэлбэ голын 70 хувь нь ямар ч далангүй. Тиймээс л БЗД-ийн 27, СБД-ийн 16 дугаар хорооны Сэлбэ гол дагуух өрхүүд өвөлдөө халиа, зундаа намагт боогдож, СБД-ийн 8, БЗД-ийн 3, 6, 25, 26 дугаар хороод урсацгүй болсон хэсгийн хогонд дарагдаж, Баянмонгол, Саруул, Дүнжингарав зэрэг орон сууцны хороолол үерийн усанд автаж байгаа.

Мэдээж Сэлбэ голын урсцаа дагаад орон сууцны хорооллын орц, гарц хийхийн тулд стандартын бус гүүрэн зам тавьж, усны салааг боосон, урсацгүй болчихсон гээд шороо асгаж байгаад амьдрах гэрээ барьчихсан, ачааны машины зогсоол хийчихсэн хэсгүүд Хан-Уул, Баянгол, Сонгинохайрхан дүүргийн нутаг дэвсгэрт бий.

 
Уг нь Сэлбэ голыг бүхэлд нь урсцыг нь сайжруулж, даланжуулах ажил хийе гэвэл Дамбадаржаагаас Сонсголон хүртэл ердөө 21.6 км. Нийслэлийн төвийн бүх дүүргийг хамарна.

Магадгүй зарим хүн Сэлбэ голын тохижилт, сэргээлт, зэргээр олон ажил хийгдсэн ч үр дүнд хүрээгүй гэх шүүмжлэлийг “шидлэх” л байх. Гэвч хотын зөвхөн төв хэсгийг анхаарч бусад газрыг орхигдуулахгүйгээр голынхоо урсцыг нэмэгдүүлж, бусад эко систем, иргэдийн ая тухыг хангахыг хүсвэл хамгийн хурдан, өртөг, төсөв багатай “Сэлбэ сэргэлт” төслийг сонирхох байтугай бүр ханцуй шамлан орох шаардлагатай болчхоод байгаа ойлгох учиртай.

 
“Сэлбэ сэргэлт” төслийг санаачлагчид хамгийн богино хугацаанд буюу ердөө энэ жилийн бүтээн байгуулалтын саруудад ажлыг хийж дуусгах боломжтой гэж байна. Учир нь Сэлбэ дагуу газар чөлөөлөлтийн ажил хийгдэхгүй.
Мөн үндэсний аж ахуйн нэгжүүдийг татан оролцуулбал ажиллах хүчний хувьд ч хүлээлт үүсгэхгүйгээр шийдвэрлэх боломжтой аж.