ЭМЯ: Урьдчилан сэргийлэх эрт илрүүлэг, үзлэг, оношилгоо, шинжилгээнд 801,765 ИРГЭН ХАМРАГДЛАА

ЭМЯ-наас цаг үеийн асуудлаар мэдээлэл хийж байна.   ЭМЯ-ны Нийтийн эрүүл мэндийн газрын дарга Д.Баярболд, 2022 оны тавдугаар сарын 1-нээс эхлэн урьдчилан сэргийлэх үзлэг эхлүүлсэн. Өнөөдрийн байдлаар 801765 иргэн хамрагдсанаас 45 хувь нь эрэгтэй, 54 хувь нь эмэгтэйчүүд. 51.1 хувь нь орон нутгийн иргэд байна. Эрт илрүүлэг, үзлэгт хамрагдсан иргэдийн 68.7 хувь нь 0-18 насны хүүхдүүд, 31.3 хувь нь 18-аас дээш насны иргэд байна.  Улсын хэмжээнд нийт иргэдийн 23 хувь нь үзлэгт хамрагдлаа. Үзлэг, шинжилгээгээр 460 мянга гаруй өвчний шинж тэмдэг давхардсан тоогоор илэрсэн. Үүний:

• 60.7 хувь нь хоол боловсруулах тогтолцооны эмгэг 
• 8.7 хувь нь дотоод шүүрэл бодисын солилцооны өвчин 
• 7.1 хувь нь зүрх судасны өвчин 
• 6.5 хувь нь шээс, бэлгийн замын тогтолцооны эмгэг 
• 6.1 хувь нь амьсгалын тогтолцооны өвчлөл 

Иргэдийг эрт илрүүлэг, үзлэг шинжилгээнд идэвхтэй хамрагдахыг уриалж байна.  0-17 насны хүүхдүүдийн дунд өвчлөлийн 214,096 сэжигтэй тохиолдол бүртгэгдсэн байна. Бүртгэгдсэн тохиолдлоос:

• Шүд цоорох 154,271 буюу 72.1 хувь,
• Шүдний гажиг 6,223 буюу 2.9 хувь, 
• Нүдний хараа алдах 2,757 буюу 1.3 хувийг эзэлж тэргүүлэх өвчлөл болж байна. Бүртгэгдсэн шүд цоорох өвчний 127 354 тохиолдол буюу 82.6 хувийг 6-17 насны хүүхэд эзэлж байна" гэлээ. 

Ц.ЧИНБАЯР: 0-4 НАСНЫ ХҮҮХДҮҮД ТОМУУГИЙН УЛМААС БОГИНО ХУГАЦААНД ӨНДӨР ХАЛУУРЧ БАЙНА

ХӨСҮТ-ийн ерөнхий захирал Ц.Билэгтсайхан Ковид-19 болон томуу, томуу төст өвчний тандалтыг мэдээллийг хүргэж байна. Тэрбээр, 51 дэх долоо хоногт ковид-19-ийн 221 тохиолдол бүртгэгдсэн. Энэ нь өмнөх долоо хоногоос 95 тохиолдлоор буурсан үзүүлэлт. PCR шинжилгээгээр эерэг илрэх хувь өмнөх долоо хоногт 1.4 хувиар буурсан. Томуу, томуу төст өвчин улсын хэмжээнд алаг цоог дэгдэлтийн түвшинд байна. Томуу, томуу төст өвчин 15 хүртэлх насны хүүхдүүдэд 80 хувьтай байна. Амьсгалын замын цочмог хүнд хэлбэр 15 хүртэлх насны хүүхдүүдэд 92 хувьтай байна. ХӨСҮТ-ийн дэд захирал Ц.Чинбаяр, Томуу, томуу төст өвчин үүсгэгч голлох гурван вирус 0-4 насныханд түгээмэл байна. Тиймээс эцэг эхчүүд хүүхдээ дулаахан хувцаслах, насанд нь тохирсон амин дэмээр баялаг хоол хэрэглэх, гэртээ агааржуулалт, чийгтэй цэвэрлэгээ хийхийг зөвлөж байна.   0-4 насныханд:

• Богино хугацаанд өндөр халуурах
• Ханиалгах
• Хоолой бачуурах
• Уушги гэмтсэн тохиолдолд амьсгаадах, амьсгалын дутагдлын шинж илэрч байна.

Хүүхэд өндөр халуурч байвал эмнэлэгт хандаж, эмчийн зөвлөсөн эмчилгээг хийлгэх шаардлагатай. ХӨСҮТ-д томуугийн улмаас 198 хүүхэд хэвтэн эмчлүүлж байгаагаас 20 орчим хувь нь уушгины хатгаагаар хүндэрсэн, үүнээс 9 хүүхэд Эрчимт эмчилгээний тасагт  хэвтэн эмчлүүлж байна гэв.