Ард түмэн Л.Оюун-Эрдэнэд итгэж байсан...

Учир нь, тэр нийгэмд нүүрсний хулгай, түүнд холбогдогчдыг илчилж, зарлана гэж амласан ч аядуу, зөөлөн явсаар иргэдийн эсэргүүцлийн жагсаалтай нүүр тулсан. Нэгэнт олон нийт шахаж эхэлсэн тул төрийн зарим өндөр албан тушаалтныг нүүрсний хэргийн холбогдогч, буруутнууд хэмээн нэрлэж, гэр бүлийнх нь хамт цагдан хорьж, дуулиан тариад байгаа.

АТГ-ынхан ч араас нь УИХ-ын нэр бүхий долоон гишүүн, Ерөнхийлөгч асан Х.Баттулга болон түүний нөхдийг нүүрсний хэрэгт холбоотойг зарлаж, яллагдагчаар татаж буйгаа мэдэгдсэн.
Уг нь жагсагчид нүүрсчдээ зарла, тэдэнтэй хариуцлага тооц, хөрөнгийг нь хурааж ав гэдэг шаардлага тавьж байгаа бөгөөд өнөөдөр 15 дахь өдрөө төв талбайд эсэргүүцлээ илэрхийлж байна.
Гэтэл өчигдөр /2022.12.19/ буюу амралтын өдөр Ерөнхийлөгч асан Х.Баттулга БНСУ-ыг зорьчихлоо.
АТГ-аас Ерөнхийлөгч асан Х.Баттулгыг хувийн баталгаа гаргуулж, БНСУ-д эмчилгээ хийлгэхээр явсан гэж мэдэгдсэн.
Гэвч УИХ-ын гишүүн, Эдийн засаг, хөгжлийн сайд Ч.Хүрэлбаатар түүний зугтаасан гэдгийг нь зарлачихлаа. Ч.Хүрэлбаатар цахим хуудастаа “Х.Баттулга өглөө 10 цагийн үед хилээр гараад зугтаажээ. Албаны хүмүүсээс тодрууллаа. Зугтаасан нь үнэн гэнэ. АТГ-д байцаалт өгч байна л гэсэн, яллагдагчаар татагдлаа л гэсэн. Нүүрсний хулгайн хэрэг? Хөгжлийн банкны хэрэг? Төмөр замын хэрэг? Энэ бүгд яах вэ? АТГ” гэжээ.

 
Үнэн хэрэгтээ ард иргэд Л.Оюун-Эрдэнийг нүүрсний хулгайч нарыг илчилж, хариуцлага тооцно гэдэгт итгэж байсан. Гэтэл гол эзэн нь хил даваад явчихлаа. Х.Баттулгын хамаарал бүхий бараг бүх хүн хил даваад зугтчихсан.
Бүх эрх мэдлийг гартаа авчихсан ХЗДХ-ийн сайд Х.Нямбаатар, Ерөнхий сайд Л.Оюун-Эрдэнэ нар яагаад түүнийг хамар доороосоо алдчихав. Ард иргэд Л.Оюун-Эрдэнэ, түүний Засгийн газарт итгэсээр өнөөг хүрсэн атал Х.Баттулгыг яагаад хил давуулан алдчихав. Яагаад...