​ Түүнийг соёлд сургая

Монголын парламент, Засгийн газрын гишүүд, тодорхой албан тушаал хашигсад гээд улстөрд тухалсан 100 гаруй албан тушаатан байдаг ч тэдний улстөрийн соёл нь ёстой л НОЙЛ заасан гэчихэд нэг их хэтийдсэн болохгүй биз.
Тэр тусмаа шинэ гишүүд буюу ШИНЭКОВ”-уудад энэ соёл ёстой үзээд өгье ч алга.
Тэдний нэг нь Ц.Цэрэнпунцаг гишүүн. Тэрбээр өчигдөр сэтгүүлчдийн асуултанд хариулахдаа ухаантай, мэдлэгтэй, гэмгүй хүний дүрээр мөн ч оодорно билээ.
Гэхдээ тэрбээр ярьж чаддаггүй юм гэхэд ядаж л биеийнхээ хэлэмж, байгаа байдлаараа тэр сэтгүүлчдийг хүндэтгэх учиртай.
Уг нь сэтгүүлчид “Нүүрсний хулгай”-н гэх хэрэгт нэр дурдагдаад буй түүнээс байр суурийг нь тодруулж ард түмэнд хүргэж буй. Гэтэл тэрбээр, "Намайг нүүрсний хулгайн хэрэгтэй холбоотой гэсэн баримтаа аваад ирвэл би гишүүнээсээ татгалзана... Тэр надад ямар хамаатай юм...” гэх зэргээр хэдэрлэж байв.
“Тэгснээ нүүрсний хувьцаа эзэмшдэг хүмүүсийг буруутгаж байгаа бол 1072 хувьцаа эзэмшдэг хүмүүс ч холбоотой. Хамтрагч, хамаарал бүхий гэж яривал Монголчууд бүгд л бие биенээ танина. Ийм логикоор харвал бүгд л холбоотой, бүгд л буруудна...” гэх зэргээр их л цэцэн цэлмэг хүний дүрд тоглохыг хичээж, бас хэдэрлэв.
Хий хоосон хардуулсан байлаа ч тэр улстөрийн соёл гээчийг барих л учиртай. Гэтэл тэрбээр дөнгөж тавагтай хоолноосоо хошуу салгасан хүн шиг эрүү амаа яйжигнуулж шүд амаа цэвэрлэсэн шиг, бүр өөрийнхөө өргөө гэрийн хойморт сууж байгаа юмны эзэн, эрх дархтны байдлаар сэтгүүлчидтэй харьцсан нь үнэндээ ард түмэнд таалагдсангүй.
Тэгээд ч ард түмэнд хардах эрх бий тул сэтгүүлчид ажил үүргээ гүйцэтгэсэн. Харин тэрбээр улстөрийн соёлтой байж түмэн олныхоо мэдэх эрхийн төлөө явж буй сэтгүүлчдийг хүндэтгэх үүрэгтэй. Тэгээд ч төрийн ордон бөхийн дэвжээ бус.
Товчхондоо бол улстөрийн соёлгүй тэдний толгойг илэх бус тэрхүү соёлд одоогийн парламент сургах учиртай. Эс бөгөөс эрчүүд нь Ц.Цэрэнпунцаг гишүүн шиг төрийн ордныг өөрийнхөө гэр орон мэт ханхалзаж, бүсгүйчүүд нь янтгар хатан мэт аягласаар байх бололтой шүү. Тиймээс гишүүдийн соёлд анхаарлаа хандуулцгаая. Тэгээд ч гишүүд соёлтой байх нь зөвхөн тэдэнд өөрт нь бас ард түмэнд хэрэгтэй бус дэлхийн энгээр яригдах асуудал шүү дээ.
Тэгээд ч түүнийг улстөрд орохоос өмнө "гэгээрсэн" гээд байсан нь ёстой худлаа бололтой.