​ Бүлгийн дарга нь хүртэл “бүлтрэх” гэж дээ

УИХ дахь МАН-ын бүлгийн дарга Д.Тогтохсүрэн ёстой наашаа харж инээж, цаашаа харж уйлах гэдэг болж байна. Нүүрсний хулгайтай тэмцэнэ гэж том дуугарсан түүний хувьд өнгөрөгч долоо хоногт бүлгийн хуралдааны талаар мэдээлэл хийхдээ “Манай намын бүлгийн гишүүдээс нүүрсний хулгай болон нүүрстэй холбоотой асуудалд холбогдсон гишүүд гэж байхгүй ээ. Үүнийг бол би хууль, хяналтын байгууллага л албан ёсоор зарлах ёстой гэж бодож байгаа. УИХ дахь МАН-ын бүлэг бол анхнаасаа ч хэлсэн. Бид нүүрсний хулгайтай тэмцэх ёстой. Ямар нэгэн хамгаалах асуудал байхгүй.” гэж том дуугарсан.
Гэвч өнгөрсөн хугацаанд нүүрсний хулгайн асуудал, эзэн, холбогдогчдын мэдээлэл дэлгэгдэж, МАН-ын бүлгийн гишүүд толгой дараалан нэрлэгдэх болсон.

Тиймдээ ч өчигдөр мань Д.Тогтохсүрэн гишүүн “Манай намын бүлгээс нүүрсний хулгайд оролцож, холбогдсон байвал бид хамгаалахгүй шүү. Хууль бүх хүнд эрх тэгш үйлчлэх ёстой.” гэчихсэн сууж байх юм.

УИХ дахь  бүлгийн дарга гэдэг утгаараа Д.Тогтохсүрэн гишүүн бусдыгаа өмгөөлөхийг хүссэн л байх. Гэвч Ерөнхийлөгч болон олон нийтийн шахалтаар хууль хүчнийхэн нэгэнтээ ажиллаад эхэлчихсэн байхад эрхэм дарга ийн худал хэлж байгаа нь өөрийнх нь хэр ёс зүйтэй хүн бэ гэдгийг л харуулах байх.
Эс бөгөөс мань хүн УИХ-ын гишүүн хэлсэн үгнийхээ төлөө хариуцлага хүлээдэггүй учраас юу ч гэж байсан хамаагүй гэсэн бодолтой явдаг юм болов уу.