​ С.Энхболд сайд аа, “Өргөө”-гийн Ц.Батболдод хариуцлага тооц

“Өргөө” амаржих газрыг дарга, удирдлагуудын хэрүүлдээ гарамгай, эх, нярайд халтай байгууллага “гэж ярьдаг нь байв. Тийм дээ ч өмнөх захирал Н.Энхцэцэг захирлыг Ц.Батболд гэгчээр сольсон. Энэ үед нь амтай бүхэн магтаж “Сайн дарга ирлээ, ажил нь одоо сайжирна, жигдэрнэ. Жинхэнэ ёс зүйтэй эмч...” гэцгээж байсан нь тун саяхан.
Тэгвэл тус эмнэлгийн дарга Ц.Батболд гэгч өнгөрөгч баасан гарагт болсон ноцтой асуудлыг нуун дарагдуулахаар ихэд сандарч буй аж. Тодруулбал “Амгалан амаржих” газарт нярайлсан эхийн хүүхэд бүтэлттэй төрсөн тул 2 хоёр хоног эмчилгээ хийлгэсэн ч харамсалтай нь бяцхан үр эндсэн байна.
Анхны үрээ алдсан гэр бүлийнхэн оршуулгын зан үйл үйлдэх гэтэл нярайн цогцсыг сольсон байжээ. Бүр хотоос гарч явах үедээ солигдсон байсныг мэдсэн тухай эх сурвалжууд хэлж байгаа юм.
Энэ талаар нярайн гэр бүлийнхэн ихэд гомдолтой, харин эмнэлгийн удирдлагуудын зүгээс ихэд нууцалж, чимээгүйхэн “зохицуулахаар” яарч сандарч, тэвдэж буй гэнэ.
Эрүүл мэндийн салбарт талийгаачдын цогцсыг сольж өгч явуулсан асуудал ганц нэг удаа гарч байгаа ч юм биш. Түүнчлэн “Өргөө” амаржих газрын хувьд ч нярайн эндэгдэл анх гарч буй асуудал биш.
Уг нь Ц.Батболд захирлын хувьд “Өргөө” амаржих газрын ажил, үйлчилгээг сайжруулахаар томилогдсон. Гэтэл өнөөдөр нярай эндэж, цогцсыг нь сольж, хүний ёсонд баймгүй үйлдэл гаргачхаад түүнийгээ нуухаар арга саам хайж байгаа нь тангараг өргөсөн эмчийн ёс зүйд хэр нийцэхийг олон түмэн хэлээд өгөх биз.
Тиймээс ёс зүйгүй үйлдэл гаргасан Ц.Батболд захиралд хатуу хариуцлага тооцож олон нийтэд мэдээлэх учиртай.