​ Ерөнхийлөгчийн шахалтаар хуулийнхан ажилдаа орлоо

Ерөнхийлөгч шахсны эцэст хуулийнхан ажилдаа орж, нүүрсний хэрэгт холбогдогчдыг баривчилж эхэллээ.
Тэр өчигдөр нүүрсний хулгайн хэрэгт холбогдогчдыг зарлахгүй, ард иргэдийг дөрөв дэх өдөрт нь жагсаал хийхэд хүргэсэн хэмээн Засгийн газрын Хэрэг эрхлэх газрын дарга Д.Амарбаясгалан, Хууль зүй, дотоод хэргийн сайд Х.Нямбаатар, Зэвсэгт хүчний Жанжин штабын дарга, бригадын генерал С.Ганбямба, Монгол Улсын Ерөнхий прокурор Б.Жаргалсайхан, Тагнуулын ерөнхий газрын дарга, хошууч генерал П.Одонбаатар, Авлигатай тэмцэх газрын дэд дарга, эрхэлсэн комиссар Г.Азжаргал, Цагдаагийн ерөнхий газрын дарга, хошууч генерал Ж.Болд нарыг дуудаж уулзсан.
Ингэхдээ “УИХ, Засгийн газраас юу хийх вэ гэдгийг дөрөв хоног харлаа. Ард түмэн дөрвөн хоног төв талбайд жагслаа. Та бүхэн ард түмнээр нүүрсний хулгайн таавар таалгалаа. Засгийн газар нүүрсний хулгайн асуудлыг хөндөж ярьсан. Гэмт хэрэгтэй тэмцэх субъект нь Засгийн газар. Тэр хулгайч нартай яагаад тэмцэхгүй байна вэ.” хэмээн бухимдсан.
Үнэхээр ч нүүрсний хулгайн асуудал эрт эхэлсэн бөгөөд одоогийн Ерөнхийлөгч У.Хүрэлсүх өөрөө 2018 онд Ерөнхий сайд байхдаа “нүүрсний хулгай”-н асуудлыг эцэслэж, хариуцлага тооцуулахаар цагдаа, тагнуул, холбогдох газруудад удаа дараа үүрэг өгч байсан билээ. Гэтэл өнөөг хүртэл энэ хэргийг эцэслээгүйн дээр сүүлийн саруудад Ерөнхий сайд Л.Оюун-Эрдэнэ болон Засгийн газрын бусад гишүүн ч нүүрсний хулгай гэж ярьснаас холбогдогч эздийнх нэрийг зарлалгүй хав дарчхаад байсан юм.
Товчхондоо нүүрсний хулгайн асуудлыг дөрвөн жилийн өмнөөс шалгахыг даалгасан байхад өнөөг хүртэл ажлаа хийгээгүй хуулийнхан өчигдрөөс л гэнэт ухаан оров бололтой.