Хуулийнхан хамар доороосоо “Их гар”-ын хулгайчдыг алдчихав уу

Ерөнхийлөгч У.Хүрэлсүх өчигдөр нүүрсний хулгайчдыг яаралтай илрүүлж нэрсийг нь олон нийтэд ил болгохыг хууль хяналтын байгууллагын удирдлагууд болон Хууль зүй дотоод хэргийн сайд Х.Нямбаатарт үүрэг болгон өгсний дагуу баривчилгаанууд эхэлжээ.

Мэдээж дээрх баривчилгааны тэргүүн эгнээнд “Тавантолгой төмөр зам”, “Эрдэнэс Тавантолгой”, “Эрдэнэс силвер ресурс” компанийн удирдлагууд болон санхүү эрхэлсэн эрх бүхий албан тушаалтнууд бий аж.
Урьд шөнийн баривчилгааны талаарх мэдээллийг өнөөдөр прокурорын байгууллагаас олон нийтэд мэдээлэх аж.
Хэдийгээр өчигдөр баривчилгаа эхэлсэн ч зарим албан тушаалтнууд болон Ерөнхийлөгч асан Х.Баттулгын хамаарал бүхий хүмүүс Монгол Улсаас оргон зайлж амжжээ.
Үүний нэг нь нүүрсний хулгайчдын нэрсийн дээгүүрт нэр эрэмбэлэгдсэн ЕТГ-ын дарга асан Ө.Шижир хил давж зугтсан тухайг албаны эх сурвалж мэдээлж байна. Учир нь тэрбээр саарал ордонд юу болж байгаа, болж буй үйл явдал хэрхэн өрнөх хуулийнхны баривчилгаа хаанаас хэрхэн эхлэх зэрэг бодит мэдээллийг хамгийн түрүүнд авч буй хүн учраас ийн гадаад руу оргон зайлсан аж.
Мөн Ерөнхийлөгч асантай үй зайгүй найз болж, түүнээс Хөдөлмөрийн баатар цол хүртэж байсан Н.Удаанжаргал ч нүүрсний хулгай яригдаж эхэлсэн өдөр Монгол Улсаас оргон зайлж өдгөө АНУ-аас байдлыг хараад сууж буй нэгэн.
Уг нь хууль хяналтынханд нүүрсний хулгайчдыг хөдөлшгүй нотлох баримтаар хангалттай шалгах үндэслэл байсан ч тэд хүсээгүй. Харин ч өдгөө иргэд болон Ерөнхийлөгчийн шахалтаар нүүрсчдийг шалгаж баривчлах гэсэн ч хулгайн хэрэгт холбоотой том акулууд нь Монгол Улсаас оргон зайлж чадсан бөгөөд тэдэнд энэ боломжийг хэн олгов гэдгийг ч шалгах хэрэгтэй болов уу.