Ж.Бат-Эрдэнэ гишүүн ээ, хуулиа унш

Монгол Улсын 2023 оны төсвийн төслийг хэлэлцэж эхлэх үеэс л УИХ-ын зарим гишүүн бухимдаж, Сангийн сайдад уураа гаргах болсон. 

Тэдний нэг нь Ж.Бат-Эрдэнэ. Түүний сонгогдсон Булган аймгийн орон нутгийн төсөвт 8 тэрбум төгрөг төсөвлөснөөс болж тэр уурлаад байгаа. Түүнээс биш бас ч үгүй 40 тэрбум төгрөгөөр 30 төсөл санхүүжүүлэхээр төсөвлөгдчихсөн байгаа. 
Мань хүний хэлж байгаагаар хувийн халааснаасаа мөнгө гаргаж байгаа юм шиг санхүүжүүлж байна гээд байгаа. Ямар сайндаа л Сангийн сайд Б.Жавхлан “Баримталж байгаа хууль маань энэ. Засаг захиргааны нэгжийн тухай хуульд заасны дагуу томъёогоор нь оруулсан. Хуулиа унш” гэх вэ дээ. 
Ингээд ч зогсохгүй Ж.Бат-Эрдэнэ гишүүн “Хэн нэгэн эрх мэдлээ дагаад илүү явж болохгүй байхгүй юу.” гэсэн нь Хэнтий аймагт хэт их хөрөнгө төсөвлөсөн гэх үгийг ч давхар дайж буй бололтой. 
Хэрвээ үнэхээр эрх мэдлээрээ далайлгаад байгаа бол Засгийн газрын ХЭГ-ын дарга Д.Амарбаясгалан дараагийн сонгуульд нэр дэвшихээ бодоод Говь-Алтайд их мөнгө төсөвлөх “эрх” эдэлж болох л байсан. Гэвч тэгсэнгүй. Тус аймгийн орон нутгийн төсөвт 15 тэрбумыг төсөвлөж, 43 тэрбумын 54 төсөл хэрэгжүүлнэ гэхэд бухимдаж, чарлаад сүрийг үзүүлсэнгүй шүү дээ. 
Сонгуулийн жилийн өмнө төсвийн реформыг эхлүүлсэн нь нэг тойргоос олон удаа сонгогдсон ч нутгаа хөгжүүлж чадаагүй гишүүдийн хувьд “усалгаа”-ны мөнгөгүй болсондоо бухимдаад байгаа нь энэ.