УЛСЫН ГУРАВДУГААР ТӨВ ЭМНЭЛЭГ “ШИЛДЭГ ТЕХНОЛОГИ НЭВТРҮҮЛЭГЧ БАЙГУУЛЛАГА”-ААР ШАЛГАРЛАА

2022 оны 10 сарын 07-09-ний өдрүүдэд “Мишээл Экспо” Олон улсын үзэсгэлэн худалдааны төвд 23 дахь жилдээ зохион байгуулагдсан “ЭРҮҮЛ МЭНДИЙН ТЕХНОЛОГИ-2022” үзэсгэлэнд тус эмнэлэг өөрийн эмнэлгийн тусламж үйлчилгээнд энэ оноос эхлэн шинээр нэвтрүүлэн нутагшуулж буй тархины судсан дотуурх мэс засал, мэдрэлийн мэс засал, чих хамар хоолойн мэс засал, зүрхний мэс засал, зүрхний хэм алдагдлын суулгацын мэс засал зэрэг нийт 5 чиглэлийн 7 мэс заслын шинэ дэвшилтэт технологийг танилцуулж оролцоо.

Тус эмнэлэг энэ удаагийн “ЭРҮҮЛ МЭНДИЙН ТЕХНОЛОГИ-2022” үзэсгэлэнгээс Мэдрэлийн мэс заслын үндэсний багийн хэмжээнд гадаадын зочин профессорын дэмжлэгтэйгээр нутагшуулж буй тархины саатай хүүхдүүдийн “Нугасны арын мэдрэлийн ёзоорыг сонгомолоор тайрах ризотоми мэс засал эмчилгээний технологи”-оороо “ШИЛДЭГ ТЕХНОЛОГИ НЭВТРҮҮЛЭГ БАЙГУУЛЛАГА”-аар шалгарлаа.

“ЭРҮҮЛ МЭНДИЙН ТЕХНОЛОГИ-2022” үзэсгэлэнд төрийн болон хувийн хэвшлийн 13 эмнэлэг, эмнэлгийн тоног, төхөөрөмжийн 14, эмийн үйлдвэр, эм ханган нийлүүлэх 41, БНСУ-ын 11 байгууллага нийт 80 орчим байгууллага оролцож, эрүүл мэндийн салбарт нэвтэрсэн шинэ техник технологи, эмчилгээ, оношилгооны арга, аргачлалаа танилцуулсан.

Дашрамд дурдахад тус эмнэлэг нь Эрүүл мэндийн шилдэг технологи нэвтрүүлэгч байгууллагаар ийнхүү 5 дэх удаагаа шалгарч байна. Өмнө нь 2016, 2018, 2019, 2021 онуудад дараалан шалгарч байсан билээ