Ирэх оны төсвийн төсөл эдийн засгийг эмчлэхэд чиглэгдэв

Энэ оны намрын чуулганаар 2023 оны төсвийн тухай хуулийг хэлэлцэж эхлэв. Монгол Улсын Ерөнхий сайд Л.Оюун-Эрдэнэ УИХ-д төсвийн тухай хуулийг танилцуулахдаа уг хууль нь олон жил яригдсан төсвийн реформын эхлэл цэг болж байгааг онцолсон юм. 

Нийгэм эдийн засгийн хүндрэлтэй нөхцөл байдалд улсын төсөв санхүүгийн бодлогыг хэрхэн боловсруулах нь ард иргэдийн дунд хүлээлт үүсгэж байсан нь нууц биш. 

Тэгвэл ирэх оны төсөвт  нийслэл хотын нийтийн тээврийн парк шинэчлэл хийх, орон нутгийн төрийн албан хаагчийн цалинг нэмэгдүүлэх, дагуул хотын хөрөнгө оруулалтыг шийдвэрлэх зэрэг томоохон бодлогыг тусгасан нь ард иргэдэд таатай мэдээлэл болов. 
Мөн экспортын орлогыг 2023 онд 11 тэрбум ам.долларт хүргэх чиг баримталж байгаа нь үүсээд буй үнийн өсөлт, ханшийн сулралыг тогтворжуулах  суурь нөхцөл болох аж. 

Түүнчлэн шинэ хөрөнгө оруулалтаас татгалзан, өмнө нь эхлүүлсэн нийт төслийн 86 хувийг бүрэн дуусгаж, ашиглалтад оруулах зэрэг асуудал тусгагдсан нь цагаа олоогүй, нэн шаардлагатай бус бүтээн байгуулалтад төсвийн мөнгө үрэгддэг асуудал цэгцрэх эхлэл тавигдав. 

Мөн төсвийн хууль нийтдээ макро эдийн засгийн тэнцвэрийг хангахад чиглэгдэж байгаа нь хүндрэлтэй цаг үед санхүүгийн салбараа аврах томоохон алхам болж байна. 

Ийнхүү 2023 оны төсвийн төслийг том зургаар нь харвал эдийн засгийг эмчлэх, сэргээхэд чиглүүлжээ.