Энэ томилгоо маш том алдаа байсан

Хоёр үзүүртэй зүү
АН-аас МАН руу гүйж очсон Л.Наранбаатарыг “Хоёр үзүртэй зүү”, “Ховч шар” гэх зэргээр хүмүүс хэлдэг.  Хөөрхий дөө, өдий болтол өөрийнхөө үзэл бодолд үнэнч тууштай байж чаддаггүй учраас л намаас нам дамжин зугуйрч явсан ч биз. 
Гэхдээ ийм хүнээс  юу ч хүлээгээд нэмэргүй гэдгийг харин алгаа тосоод авсан нам нь мэддэггүй нь тун тоогүй. Тэгээд ч түүнийг стратегийн чухал газрыг удирдуулахаар томилсон нь өнөөдөр Монгол Улсын эдийн засагт маш том гай авчирсан гэж бултаараа дүгнэж байна. 
Товчхондоо бол тэрбээр шударга өрсөлдөөн гэдгийг бүр умартаж, ёстой л амаараа, хий хоосон сүржигнэж, цементийн үнийг буулгана, зах зээлийн 30 хувийг дангаараа даачихна гэж өрсөлдөгч нараа доош нь хийж  байсан нь саяхан. Тэгвэл дорд үзсэн өрсөлдөгч нар нь өдгөө үйлдвэрлэлээ явуулдгаараа явуулж, түрүүлж дуугарсан түүний хоншоор  харин хөлдөж мэдэхээр болчхоод байгаа. 
Унасан бөхөд шалтаг мундахгүй гэдэг  шиг  “Улайсан данстай, ажил нь унасан газар хүлээж авсан. Яалт ч үгүй засвар хийх шаардлагатай болсон. Ирэх сарын 1-нээс цементээ хэвийн гаргана ш дээ. Импортын цементийн үнийг тэглэсэнд харамсаж байна...  “Жаахан түргэдчихлээ” гэсэн утгатай зүйл хэлж өөрийгөө хаацайлах аргаа олж ядан МАН-аа нэг магтаж, нэг муулж  ёстой л “Хоёр үзүүртэй зүү” шиг л явна. 
Л.Халтар сайдын шахалт шаардлагаас болоод  үнийн өсөлтийн эсрэг аяныхаа  бүх цементийг Дарханы замын ажилд өгсөн. Буруутан  нь тэр” гэсэн шүү юм ярьж олны дургүйцлийг бүр ч хүргэж буй тэрбээр “Энэ томилгоо маш том алдаа байсан” гэдгийг харин ч нэг харуулчхлаа. Тэгэхээр арай л мэдрэмжтэй  өөрийгөө гэхээс илүү улс орноо өчүүхэн ч гэсэн боддог хүнийг томилчихмоор юм гэдгийг олон түмэн яриад эхэлчихлээ.