Сангийн сайдын шийдвэр ААН-үүдийг баярлуулав

Бүтээн байгуулалтын ид үед монголчууд цементийн хомстолд орж  бүхий л ажил зогсчхоод байгаа. Тэгвэл өчигдрийн Засгийн газрын хуралдаанаар импортын зарим бараа бүтээгдэхүүн, тэр тусмаа цементийн гаалийн татварыг 2022 он дуустал  “ТЭГ”-лэсэн нь ААН-үүдийг магнайг тэнийлгэв.

Товчхондоо бол Сангийн сайд Б.Жавхлан энэ ажлыг гардаж хийсэн нь жинхэнэ нүдээ олсон ажил боллоо гэж олны зүгээс сайшааж эхэллээ. Тэрбээр өнгөрөгч 7 хоногт Дарханы замын ажлын явцтай танилцаж олон жил дуншсан энэ замыг яаравчлахыг мөн барилгын салбар болон бетон зуурмагийн үйлдвэрүүдийн ажил зогсонги байдалд ороод байгааг анхааралдаа авсан нь энэ.

Цемент үйлдвэрлэдэг дотоодын 4 үйлдвэрийн 3 нь ажиллаж 1 нь засвар хийж байгаа ч зах зээлийг  үнэндээ  хангаж дийлэхгүй бүтээн байгуулалтын ажлууд гацсан учраас арга буюу дээрх шийдвэрийг гаргасан нь хамгийн зөв гаргалгаа байв.

Ямартай ч Сангийн сайд Засгийн газарт уг асуудлыг дэвшүүлснээр өнөөдөр цементийн  гаалийн татварыг ийнхүү түр ч болов  зогсоож чадлаа.

Уг нь төр засгийн зүгээс дотоодын үйлдвэрүүдээ дэмжиж импортоор оруулж ирж байгаа цементийн  татварыг 20 хувиар нэмээд байсан ч  Хөтөлийн цемент шохойн үйлдвэрээс эхлээд олны сэтгэл санаагаар тоглож ”Зах зээлийн  бараг 30-40 хувийн дангаараа хангана” гэж даналзсаар өнөөдрийн нөхцөл байдалд хүргэсэн тул Засгийн газраас  ийм шийдвэр  гаргахад хүргэв.

Гэхдээ энд үндэсний үйлдвэрүүдээ үл тоосон асуудал огт биш  бөгөөд “Мон цемент”, “Мак Евро цемент”, “Улаан цемент” гэх үйлдвэрүүд өдгөө ч бүрэн хүчин чадлаараа ажиллаж байгаа гэдгийг зориуд хэлэх учиртай.

Нөгөөтэйгүүр импортын цементийн үнийг тэглэсэн энэ асуудлыг дагаад сөрөг зүйлс яригдах ч Сангийн сайдын хувьд хэрэглэгчдийн эрх ашгийг хамгаалж бүтээн байгуулалтын энэ ахархан хугацаанд тогтвортой үнээр зах зээлийг хангахыг чухалчилсан.

Ийм шийдвэр гарсантай холбоотойгоор урд хөршид цементийн ачилтын цуваа Монгол руу гарах гэж буй мэдээллийг Замын-Үүдээс эх сурвалжууд дүрсжүүлэн баримтаар илгээснийг бид өчигдөр хүргэсэн.  

Эцэст нь өгүүлэхэд үндэсний үйлдвэрүүд өөрсдийн боломж болон зах зээлээ алдахгүйн тулд үнэ болон нийлүүлэлтдээ яаралтай арга хэмжээ авахгүй бол магадгүй дээрх шийдвэр он дамнан үргэлжлэхийг ч сануулахад илүүдэх юун.