​ МАН-ыг мандуулах уу, маллах уу

МАН-ын генсек Д.Амарбаясгалан Засгийн газрын ХЭГ-ыг удирдах болж, түүний орыг хэн залгах вэ гэдэг асуулт гарч ирсэн.
Мэдээж Ардын намын хувьд араа бодолгүйгээр Д.Амарбаясгаланг Засгийн газартаа дуудаагүй нь тодорхой. Харин өөдөлж өгөхгүй байгаа засгийн ажлыг базуулахаар шийдвэрлэсэн хэрэг.
Мань генсекийн оронд ХНХ-ын сайдын суудлаа өгч буй А.Ариунзаяаг очих нь гэж чих дэлсэж байгаа ч МАН-ынхан түүнийг хүлээн авахгүй л болов уу.
Угаасаа намын дүрмийн дагуу бол Бага хурлаар хэлэлцэж байж Ерөнхий нарийн бичгийн даргаа сонгох учиртай. Яах вэ, А.Ариунзаяагийн хувьд боломжийн менежер гэдгээ харуулсан ч МАН-ын дунд болоод түүнээс дээш насныхан эмэгтэй хүнээр удирдуулахгүй гэх муйхар бодол, сэтгэлгээнээсээ салаагүй учраас дэмжихгүй, шахагдах магадлалтай. Эсвэл 2024 оны сонгуульд нэр дэвших эрхээ халааслах гэсэн шалтгаанаар чимээгүйхэн суух байх.
Түүнтэй эн зэрэгцүүлэн Ц.Бат-Энхийн нэр ч дуулдаж яваа. Мань хүнийг бол МАН-ынхан тийм ч таатай хүлээж авдаггүй. Хоёр жилийн өмнө коронавирусын ид дэгдэлтийн үеэр Улсын онцгой комиссын шийдвэрийг эсэргүүцэж, тусгаарлалтад орохгүй хэмээж “агсарсан” түүнийг МАН-ын нарийн бичгийн даргаас чөлөөлсөн. Дараагийн удаа буюу өнгөрөгч зургаадугаар сард Төрийн хэмнэлтийн тухай хуулийн дагуу “Эрдэнэт үйлдвэр”-ийн ерөнхий захирлын Хамтын ажиллагаа, нийгмийн асуудал эрхэлсэн орлогчийн албан тушаалаас нь “үдсэн”.
Одоогоор Засгийн газраа эмхлэх гээд МАН-ынхан генсекийн суудалд дээрх хоёр хүний нэрийг олон нийтэд “чулуудаж” өгчхөөд харж суугаа.
Юутай ч А.Ариунзаяа, Ц.Бат-Энх гээд нэрс цуварсан ч МАН-ын дараагийн генсек бол Д.Амарбаясгалангийн тоглолтыг залгамжлах эс бөгөөс түүний шууд удирдлагад хэлж, ярьж, хөдлөх хүн л хэрэгтэй. Тэгж гэмээнэ МАН-ыг мандуулах, маллах эсэх нь харагдана.