Х.Баянмөнх: Та бүхэн минь өнө мөнх жаргал цэнгэлтэй баярлаж яваарай

Домогт их аварга Х. Баянмөнх тэгш ой давхацсан баяр наадмын тавын давааны өмнө алдар цолоо дуудуулж, зодгоо тайллаа. 

Тэрбээр ёслолынхоо дараа "Энэ бол их аз хийморьтой үйл явдал. Би өнөөдөр 80 хүрээд, төр ард түмний их баяр наадам 100  наслаад, засаг төрөөс зодгоо тайлах эрхийг надад өгөөд ёслон тэмдэглэж байгаадаа баяртай байна. 

Дахин зодог шуудагтайгаа ногоон зүлгэн дээрээ хүчээ үзэж чадахгүй боллоо гэхээр ХӨНГӨН МЭДРЭМЖ төрж байна. Гэхдээ би өөртөө  "Чи 13 настай бөхийн аманд гарч байсан. Одоо 80 настай,  68 жил ногоон дэвжээндээ хүчээ үзлээ, дэлхийд барилдлаа, шинжлэх ухаан, шавь бэлтгэх ажлаа гүйцэтгэлээ болоо юм бишүү" гэж  хатуу үг хэлээд хүлээн зөвшөөрч байна.

Цаашид миний монголын ард түмэн өвөг дээдсийн минь үлдээсэн дэлгэр дүүрэн зуны гурван зүйлийн наадмыг чанартай сайн хийж, цэвэр ариун ёс зүйтэй авч явж, өвөг дээдсийн минь үлдээсэн энэ их соёлыг чамбайхан, чансаатай авч явах байх гэж найдаж байна. 

Олон түмнээ эрүүл энх, бусдын сайн сайханд баярлаж, санааны зоргоор амьдардаг хорвоод сайхан санаатай яваарай гэж ерөөе. Та бүхэн минь өнөд мөнх жаргал цэнгэлтэй баярлаж яваарай" хэмээлээ.