Зүтгүүрийн депогийн 30 жилийн ой энэ оны 6-р сарын 22-нд тохионо

Тээвэр ложистикийн төвийн Зүтгүүрийн депогийн 30 жилийн ой энэ оны 6-р сарын 22-нд тохионо. Түүхт ойгоо угтаж, тус төвийнхөн УБТЗ хувь нийлүүлсэн нийгэмлэгийн  байгууллагуудтай  хамтын ажиллагаагаа өргөжүүлэх, галт тэрэгний хөдөлгөөний найдвартай ажиллагаа,  тээвэрлэлтийн  шуурхай байдлыг хангах, хамт олны дунд эерэг харилцаа хандлага бий болгож, ажлын уялдааг сайжруулах зорилгоор үйл ажиллагааны  төлөвлөгөө гарган ажиллаж байгаа тухай Тээвэр ложистикийн төвийн орлогч дарга Г.Баяр мэдээллээ. 

Түүхт ой,  Төмөр замчдын өдрийг угтан  мэргэжлийн ур чадварын тэмцээн, сэлгээний бригад, зааварлагч машинчтай хамтарсан сургалт,   мэдлэг сорьсон АХА, гар бөмбөг, ширээний теннисний нөхөрсөг тэмцээн, чөлөөт цагийн цэнгээнт нэвтрүүлэг, караоке дууны тэмцээн зохион байгуулж, Илчит тэрэгний зүтгүүрийн депод тохижилт сэргээн засварын ажил   хийх аж. 

Одоогийн байдлаар   Эрдэнэт өртөөний Эрдэнэт депо, Ачаа тээврийн, Хөдөлгөөний, Замын хэсгийн ажилчидтай  уулзалт хийж, харилцан туршлага солилцсон бөгөөд тэднийг Эрдэнэт үйлдвэртэй танилцуулжээ. Түүнчлэн УБТЗ ХНН-ийн хойд хэсгийн  Сэлэнгэ, Зүүнхараа, Дархан, Шарын гол, Хөтөл, Эрдэнэтийн Дулааны цахилгаан станц, Тээвэр ложистикийн албаны   Зүтгүүрийн баг, Сэлгээний бригадуудын хооронд мэргэжлийн ур чадварын тэмцээн зохион байгуулсан байна.