Тодорхойгүй хугацаагаар сардаа хэд хэдэн удаа "хаалгаа барьдаг" ХААН банк ТОП аж ахуй нэгжээр нэрлэгдсэн гэв үү?

Өчигдөр Монгол Улсын ТОП аж ахуйн нэгжүүдийг тодруулах ёслол боллоо. Үүнд хэдхэн хоногийн өмнө харилцагч үйлчлүүлэгчдээ бухимдуулж, "хаалгаа барьсан" ХААН банк багтсан нь шүүмжлэл дагуулж байна. 

-Монгол Улс ТОП-100 аж ахуйн нэгжүүдийг эрэмбэлэхдээ  тухайн жилийн орлого, улсын төсөвт оруулсан татвар, нийгмийн даатгал төлсөн ажиллагсдын тоо, ашиг, хөрөнгийн хэмжээ гэсэн үндсэн үзүүлэлтүүдийг авч үздэг. Эдгээр шалгуур үзүүлэлтүүдийг хангасан гэх ХААН банкны хувьд  Монгол Улсын нийт айл өрхийн 70 гаруй хувьд буюу 2.7 сая харилцагчид банк санхүүгийн үйлчилгээг хүргэдэг гэх тодотголтой гэж байгаа. Гэтэл хариуцлагагүй, итгэлгүй, найдваргүй гэсэн тодорхойлолтын эзэн болсон тус банк  ТОП аж ахуйн нэгжээр нэрлэгдсэн нь анхаарал татаж байна. 

Сар бүрийн нэг өдөр тус банкаар үйлчлүүлдэг иргэд санхүүгийн үйл ажиллагаа авч чадахгүйд хүрч байгаа нь  нийгэм даяар бухимдал дагуулсаар байна. Нэг үгээр тус банк санхүүгийн  найдвартай үйлчилгээг иргэдэд хүргэх нь бүү хэл,  картын систем, цахим сувгууд болон мобайл банк тодорхойгүй хугацаагаар гацаж "хаалгаа барьж" буй. 

Ийнхүү тодорхойгүй хугацаагаар сардаа хэд хэдэн удаа "хаалгаа барьдаг" ХААН банк ТОП аж ахуй нэгжээр нэрлэгдсэн нь хэр бодитой үнэлгээ вэ гэх асуулт урган гараад байна.