Усан парк биш орон сууц барих гэж буй нь үнэн гэв

Усан парк баригдахаар төлөвлөгдсөн газарт орон сууцны барилга барихтай холбоотой асуудал нийгмийн сүлжээнд анхаарал татаж байна. 

Сануулахад, Улаанбаатар хотод Азид хамгийн томд тооцогдох усан парк, спорт цогцолборыг Энхтайваны гүүр болон Замын Цагдаагийн газрын урдах Фрейзерийн хоорондох 11,8 га газарт байгуулахаар төлөвлөөд багагүй хугацаа өнгөрсөн.  Байгууламжийн 70 хувь нь ногоон байгууламж байхаар төлөвлөгдөж байв. 

Гэвч уг газарт орон сууцны хороолол барьж эхлээд буйтай холбогдуулан  Нийслэлийн Засаг даргын хэвлэлийн төлөөлөгч Н.Сугар өөрийн цахим хуудастаа  "Тухайн газрыг анх 2008 оны есдүгээр сарын 17-нд орон сууцны зориулалтаар олгогдож байжээ. Тус газрын эзэмших эрхийг 2020 оны есдүгээр 30-ны захирамжаар цуцалж, ногоон байгууламж болгох шийдвэр гарсан.

 Гэвч захиргааны хэргийн шүүхийн 2021 оны есдүгээр сарын 30-ны өдрийн шийдвэрээр НЗД-ын захирамжийг хүчингүй болгож газрын эрхийг сэргээх шийдвэр гаргасан. Шүүхийн шийдвэрийг биелүүлэх үүрэгтэй учир 2022 оны нэгдүгээр сарын 11-ний захирамжаар тухай газарт худалдаа, нийтийн үйлчилгээ, төв цогцолбор, орон сууц, сургууль, цэцэрлэгийн зориулалтаар эзэмшүүлэх захирамж гарчээ" гэжээ.