Намаасаа хөөгдөх сануулгатай Хөгжлийн банкны асуудалд нэр холбогдсон МАН-ын гишүүдийн асуудал юу болов

Хөгжлийн банкинд хуримтлагдсан 1,8 их наяд төгрөгийн чанаргүй өр зээлийн асуудал Монгол Ардын нам, ард иргэдийн анхаарлын төвд байгаа билээ. Иймээс МАН-ын генсек өнгөрсөн сарын 30-нд Хөгжлийн банкнаас өөрөө болон хамаарал бүхий хүмүүс нь зээл авсан ЕСӨН хүнийг нэр цохон шалгуулахыг үүрэгдсэн. 

Тэд бол УИХ-ын гишүүн С.Бямбацогт,  УИХ-ын гишүүн Х.Ганхуяг,  УИХ-ын гишүүн Г.Амартүвшин,  УИХ-ын гишүүн Г.Дамдинням, УИХ-ын гишүүн Ч.Ундрам,  УИХ-ын гишүүн асан М.Билэгт,  УИХ-ын гишүүн асан А.Сүхбат,  УИХ-ын гишүүн асан Ц.Гарамжав,  Дэд сайд асан Ш. Лхамсүрэн нар юм. 

Өнөөдрийн байдлаар УИХ-ын гишүүн Г.Амартүвшин УИХ-ын гишүүнээсээ татгалзан, шалгуулахаар болсноо мэдэгдсэн. Харин үлдсэн НАЙМАН нь хуулийн байгууллагаар шалгуулсан эсэх нь тодорхой болоогүй байна.

Тодруулбал, МАН-ын Хяналтын ерөнхий хороо Хөгжлийн банкны асуудлаар хуралдаж, Хөгжлийн банкны зээлд нэр холбогдсон гишүүдийг өөрийн санаачлагаар 4-р сарын 10-ны дотор хууль, хяналтын байгууллагад хүсэлтээ гарган гэм буруутай эсэхээ шалгуулахыг үүрэг болгосон. Хэрэв 4-р сарын 10-ны дотор хуулийн байгууллагаар шалгуулах хүсэлтээ гаргаагүй бол намын гишүүнээс түдгэлзүүлэхээ мэдэгдэж, гэм буруутай нь тогтоогдвол намын дүрмийн дагуу гишүүнээс хасах шийдвэрээ танилцуулаад байгаа билээ. Харин заасан хугацаанд МАН-ын дээрх нэр бүхий гишүүд хуулийн байгууллагаар шалгуулсан уу гэх асуулт анхаарал татаж байна.