Их дээд сургуулиудыг хотоос гаргах нь зөв үү?

Нийслэлчүүдийн хувьд замын түгжрэл анхаарал татсан асуудлын нэг болоод байна. Автозамын түгжрэлэийг бууруулах талаар олон саналууд гарч байна.

 Өнөөдрийн байдлаар автозамын түгжрэлийн бууруулах үндэсний хорооноос бүх чиглэлд судалгаа хийхийг үүрэг болгожээ. Энэ судалгаагаар зах худалдааны төв болон их дээд сургуулиудыг хотоос гаргавал ямар үр дүн, нөлөөлөл үзүүлэх вэ гэх асуултын хариултыг гаргах юм. 

Угаас энэ бол үеийн үед хөндөгдөж ирсэн асуудал. Тухайлбал,  Улаанбаатар хотоос хөдөө орон нутагт их, дээд сургуулиудын салбар сургуулиудыг нүүлгэх тогтоол хэд хэдэн гарч байсан. Харамсалтай нь амьдралд хэрэгжээгүй.

Хамгийн сүүлд өнгөрсөн намар их дээд сургуулиудыг нийслэлээс гаргах шийдвэр гаргасан. Монгол Улсад өнөөдрийн байдлаар 88 их, дээд сургуульд 150 мянган оюутан суралцаж байна. Үүний 143 мянга нь Улаанбаатар хотод, 7000 нь хөдөө орон нутагт 8 их, дээд сургуульд суралцаж байгаа юм. Нийт оюутны 92 хувь нь Улаанбаатар хотод суралцаж буй үзүүлэлт байгаа аж.

Иймээс их дээд сургуулиудыг нийслэлээс гаргах нь оновчтой шийдэл хэмээн үзэж өнгөрсөн намар Эрдэнэт, Дархан, Өмнөговь аймагт сургалт судалгаа, үйлдвэрлэлийн цогцолбор болгож МУИС, ШУТИС, ХААИС-ийн сургуулиудыг байгуулах шийдвэр гаргасан. 

 Иймээс энэ шийдвэрийг бодит ажил хэрэг болгох нь нийслэлийн автозамын түгжрэлийг бууруулах оновчтой шийдлийн нэг гэж үзэх хэсэг байгаа юм.