Бауыржаны балгаар Баян-Өлгий "хоосрох" нь

Эрх баригчдын зүгээс хүн амын төвлөрлийг сайруулж, орон нутагт хөгжлийг бий болгох  чиглэл барин ажиллаж буй. Гэтэл аймгийн Засаг дарга нар энэ бодлогын эсрэг үйл ажиллагаа явуулж байгаад тус аймгийнхан шүүмжлэлтэй хандаж байна. 

Тухайлбал,  Баян-Өлгийн аймгийн Засаг дарга Д.Бауыржан иргэдээ нийслэл рүү "нүүлгэх" сонирхолтой нэгэн гэх. Эх сурвалжуудын мэдээлж байгаагаар Б.Бауыржан өөрийн хамаарал бүхий хүмүүсээ аймагтаа дарга, даамал болгоод бусдыг нь нийслэл рүү "нүүлгэх" тактик барьж байна уу, гэхээр үг үйлдэл гаргах болжээ. Түүний хувьд аймгийн Засаг дарга болсноосоо хойш хамаарал бүхий хүмүүсээ албан тушаалд томилсон гэх асуудал хэрээс хэтэрсэн. 

Тэгвэл энэ удаад Улаанбаатар хотод зөвлөгөөнд оролцохоор ирсэн даруйдаа Засгийн газрын хэд хэдэн сайд, ААН-үүдтэй болсон уулзалт хийжээ. 

Ингэхдээ нэг ААН-д гэхэд Баян-Өлгий аймгийн харьяат иргэдийг ажиллуулах тохироо хийжээ. Эх сурвалжийн мэдээлж байгаагаар тухайн компанид өнөөдрийн байдлаар тус аймгийн харъяат 83 иргэн ажилладаг бөгөөд ийнхүү орон нутгийн иргэдийг хот руу "зөөж" байгаад нутгийн иргэд шүүмжлэлтэй хандаж байгаа аж.

Уг тус аймгийг тэргүүлж байгаагийн хувьд орон нутагтаа ажлын байр бий болгож, иргэдийнхээ ая тухтай ажиллаж хөдөлмөрлөх эрхийг хангах байтал ийнхүү хэсэг хэсгээр нь нийслэл рүү "нүүлгэж" байгаа нь анхаарал татсан үйл явц болоод байгаа аж.

Д.Бауыржаны хувьд Улаанбаатар хотод  500-600 иргэнээ гэр бүлээр нь Улаанбаатарт амьдруулах чиглэл барин ажиллах байгаа гэх. Энэ талаар тэрбээр “...Тус компанийнхан манай аймагт өөрсдөө очиж ажилтнуудаа авахаас гадна сургаж, дадлагажуулах юм. Мөн гэр бүлийн хүмүүсийг хамтад ажиллуулахаас эхлээд хуримтлал үүсгэх, орон сууцыг хөнгөлөлттэй нөхцөлөөр олгож өгөх хүсэлт тавив. Мөн тус компанийн зүгээс ажилтнуудыг амьдрах орон байраар хангах, хоол ундыг хариуцах хүсэлтийг хүлээж авсан нь таатай боломж мөн...” гэж бичжээ.

Ийнхүү Засгийн газрын бодлого үйл ажиллагааны эсрэг ажиллаж, өөрийгөө хэмжээлшгүй эрхтэн дархтан мэт аяглаж байгаа нь Баян-Өлгийчүүдэд таалагдахгүй байгаа аж.