АТГ: Мөрдөн шалгах ажиллагаа эхэлснээс хойш Хөгжлийн банкинд 8,5 тэрбум төгрөг эргэн төлөгдсөн байна

АТГ-аас Хөгжлийн банкны асуудлаар мэдээлэл хийж байна. Хөгжлийн банкнаас АТГ-т ирүүлсэн гэмт хэргийн талаарх гомдол мэдээллийг үндэслэн АТГ-ын Мөрдөн шалгах хэлтсээс мөрдөн ажиллагаа явуулж байна. 

Хөгжлийн банкнаас ирүүлсэн хугацаа хэтэрсэн, чанаргүй 52 зээлийг олгосон албан тушаалтнууд нь албан тушаалын байдал эрх мэдлээ урвуулан ашиглаж зээлдэгчдэд давуу байдал олгосон эсэх, ААН-үүдээс хахууль авсан эсэх, төрд хохирол учруулсан эсэх асуудал дээр мөрдөгчдийн ажлын хэсэг байгуулан мөрдөн шалгах ажиллагааг эхлүүлсэн байна. 

Мөрдөн шалгах ажиллагааны хүрээнд Хөгжлийн банкинд учирсан хохирлыг арилгуулахаар дараах арга хэмжээг авч хэрэгжүүлж байгаа аж. 

• Зээлийг зориулалтын бусаар зарцуулсан тохиолдолд зээлийг цуцлуулах, эргэн төлөөлүүлэх,
• Зээлдэгч компанийн болон тухайн компанийн хувьцаа эзэмшигчдийн хувийн хөрөнгө, дансыг захиран зарцуулах эрхэд хязгаарлалт тогтоох, 
• Зээлдэгч аж ахуйн нэгжүүдийн эцсийн өмчийг тогтоох, ААН болон эздийн нуугдмал хөрөнгийг илрүүлэн төрийн зөрчигдсөн эрхийг сэргээх,

Төрд учруулсан хохирлыг барагдуулах чиглэлээр мөрдөн шалгах ажиллагаа явуулж байна

Мөрдөн шалгах ажиллагаа эхэлснээс хойш 8,5 тэрбум төгрөг эргэн төлөгдсөн байна. 

 АТГ-аас өнөөдрийн байдлаар 

• 186 үл хөдлөх хөрөнгө
• 124 тээврийн хэрэгсэл
• Үйлдвэрийн нэг байр
• Нэг лиценз
• 13 дансыг битүүмжилж, хязгаарлалт тогтоожээ.